ٹریفک قوانین کی خلاف ورزی کرنے والوں کے خلاف مقدمات درج نہ کرنے کی ہدایت

(24نیوز)ڈپٹی انسپکٹر جنرل (ڈی آئی جی) اسلام آباد نے ٹریفک پولیس کو ٹریفک قوانین کی خلاف ورزی کرنے والے شہریوں کے خلاف مقدمات درج نہ کرنے کی ہدایت کر دی۔

ڈی آئی جی اسلام آباد علی وسیم نے متعلقہ افسران اور اہلکاروں کو ہدایت کی کہ ٹریفک قوانین کی خلاف ورزی کی صورت میں قانون کے مطابق جرمانہ کیا جائے اور مقدمات درج کرنے سے گریز کیا جائے۔

ٹریفک قوانین کی خلاف ورزی پر جون 2026 میں اسلام آباد ٹریفک پولیس کی جانب سے باقاعدہ مقدمات درج کرنے کا سلسلہ شروع کر دیا تھا، پہلے دو ہفتوں کے دوران 500 کے قریب مقدمات درج کئے گئے تھے، جولائی اور اگست میں بھی ٹریفک پولیس نے بڑی تعداد میں ون وے، تیز رفتاری، لین کی خلاف ورزی اور بغیر لائسنس ڈرائیونگ کرنے پر مقدمات درج کئے، پولیس نے مقدمات کیساتھ ساتھ سیکڑوں گاڑیوں اور موٹر سائیکلوں کو بھی تحویل میں لیا تھا۔

ڈی آئی جی نے ٹریفک پولیس اہلکاروں کو شہریوں سے خوش اخلاقی سے پیش آنے اور قانون کے یکساں نفاذ کو یقینی بنانے کی بھی ہدایت کرتے ہوئے کہا کہ ٹریفک قوانین کا مقصد شہریوں کو بلاوجہ مشکلات سے دوچار کرنا نہیں بلکہ سڑکوں پر نظم و ضبط اور محفوظ سفری ماحول کو یقینی بنانا ہے۔

یہ بھی پڑھیں:خیبرپختونخوا کے شہری اپنے وزیراعلیٰ کی کارکردگی سےغیرمطمئن، سہیل آفریدی پر شدید تنقید

ڈی آئی جی نے شہریوں پر بھی زور دیا کہ دورانِ سفر ٹریفک قوانین کی مکمل پابندی کریں، ڈرائیونگ لائسنس اور گاڑی کے ضروری کاغذات ہمراہ رکھیں، مقررہ رفتار کی پابندی کریں اور ٹریفک سگنلز کی خلاف ورزی سے گریز کریں۔

پولیس کے مطابق شہریوں کی جانب سے ٹریفک قوانین کی پابندی نہ صرف قانونی کارروائی سے بچنے میں مدد دیتی ہے بلکہ سڑکوں پر حادثات اور ٹریفک کے مسائل میں کمی لانے کے لیے بھی اہم ہے۔