ویرات کوہلی کا ون ڈے  میں نیا ریکارڈ

(ویب ڈیسک)بھارتی کرکٹ ٹیم کے سٹار بیٹر ویرات کوہلی نے ویسٹ انڈیز کے خلاف پہلے ون ڈے میں شاندار بیٹنگ کرتے ہوئے ایک اور بڑا ریکارڈ اپنے نام کرلیا اور ون ڈے انٹرنیشنل کرکٹ میں 15 ہزار رنز مکمل کرنے والے دنیا کے دوسرے تیز ترین بیٹر بن گئے۔

اتوار کے روز بھارتی شہر تھروواننتھاپورم میں کھیلے گئے پہلے ون ڈے میں ویسٹ انڈیز کے 396 رنز کے ہدف کا تعاقب کرتے ہوئے ویرات کوہلی نے شاندار بیٹنگ کا مظاہرہ کیا۔ کوہلی نے اننگز کے 29 ویں اوور میں الزاری جوزف کے ایک ہی اوور میں مسلسل 3 چوکے لگا کر ون ڈے کرکٹ میں 15 ہزار رنز مکمل کیے۔

یاد رہے کہ کوہلی میچ سے قبل 314 ون ڈے میچز کی 302 اننگز میں 14 ہزار 941 رنز بنا چکے تھے اور انہیں 15 ہزار رنز مکمل کرنے کے لیے صرف 59 رنز درکار تھے۔

مزید پڑھیں:بارش کے باعث پاکستان اور ہانگ کانگ کا کوارٹر فائنل منسوخ، پاکستان سیمی فائنل میں پہنچ گیا

 15 ہزار ون ڈے رنز مکمل کرنے والے بیٹرز کی فہرست میں سچن ٹنڈولکر سب سے آگے ہیں، ٹنڈولکر نے اپنے ون ڈے کیریئر میں 463 میچز کی 452 اننگز میں 18 ہزار 426 رنز بنائے، ان کا بہترین اسکور 200 ناٹ آؤٹ رہا جب کہ انہوں نے 49 سنچریاں اور 96 نصف سنچریاں بھی بنائیں۔

ویرات کوہلی اب 15 ہزار رنز مکمل کرنے کے ساتھ اس فہرست میں دوسرے نمبر پر آگئے ہیں تاہم انہوں نے یہ سنگ میل صرف 315 ویں میچز کی 303 ویں اننگز میں عبور کیا جب کہ سچن ٹنڈولکر نے 15 ہزار رنز 387 ویں میچز کی 377 ویں اننگز میں مکمل کیے تھے، اس طرح کوہلی نے یہ سنگِ میل ٹنڈولکر کے مقابلے میں 74 اننگز پہلے حاصل کیا، اس سے قبل بھی کوہلی کئی بڑے ون ڈے رنز کے سنگِ میل تیز رفتاری سے حاصل کرنے کا ریکارڈ رکھتے ہیں۔