یوم عاشور:شہر شہر ماتمی جلوس،سبیلیں،شہداء کربلا کو خراج عقیدت

(24 نیوز )ملک کے مختلف شہروں سے شہدائے کربلا کی یاد  میں یوم عاشورہ کی مناسبت سے ماتمی جلوسوں کی برآمدگی کا سلسلہ جاری ۔

10 محرم الحرام کے سلسلے میں عزادار نوحہ و ماتم کے ذریعے شہدائے کربلا کے حضور نذرانہ عقیدت پیش کر رہے ہیں، جلوس کے راستوں پر پانی کی سبیلوں اور نذر و نیاز کا اہتمام کیا گیا ہے، ہر طرف سے یا حسینؑ یاحسینؑ کی صدائیں بلند ہو رہی ہیں۔

کراچی

 کراچی میں 10 محرم الحرام کا مرکزی جلوس نشتر پارک سے برآمد ہوگیا جو مقررہ راستوں سے ہوتا ہوا حسینیہ ایرانیاں امام بارگاہ کھارادر میں اختتام پذیر ہوگا،نشتر پارک میں یومِ عاشور کی مجلس ہوئی جس سے علامہ سید شہنشاہ نقوی نے خطاب کیا جس کے بعد مرکزی جلوس برآمد ہوا۔

لاہور

لاہور کی نثار حویلی سے برآمد ہونے والے جلوس میں ہزاروں عزادار شریک ہیں،جلوس کے راستوں میں سبیلیں ، نذرو نیاز کا اہتما م کیا گیا ، عزاداروں میں مختلف مقامات پر رک کر امام حسینؓ کی شہادت حضرت علی اکبرؓ کی آخری اذان کا تذکرہ اور نبیؐ کے گھرانے پر مظالم کے غم میں زنجیر زنی کی ،جلوس کے راستے میں مختلف جگہوں پر انٹر نیٹ سروس اور موبائل فون سروس معطل کی گئی ۔

پشاور
پشاور میں یومِ عاشور پر مختلف امام بارگاہوں سے 12 جلوس برآمد ہوں گے، پہلا جلوس صبح 11 بجے امام بارگاہ سید علی شاہ رضوی کوچہ جان پیپل منڈی سے برآمد ہو گا،شہر میں جلوسوں کی سیکیورٹی کے لیے پولیس کے 13 ہزار اہلکار تعینات کیے گئے ہیں جبکہ جلوس کی گزرگاہوں کو کلیئر کرنے کے لیے بم ڈسپوزل یونٹ کے اہلکار بھی موجود ہوں گے،پشاور میں جلوسوں کی طرف جانے والے تمام راستے سیل کر دیے گئے ہیں جبکہ موبائل فون سروس بھی بند ہے۔

کوئٹہ
کوئٹہ میں دسویں محرم الحرام کا جلوس علمدار روڈ سے برآمد ہو گیا جو نماز مغرب پر دوبارہ علمدار روڈ پہنچ کر اختتام پذیر ہو گا،جلوس کے لیے شہر میں سخت حفاظتی انتظامات کیے گئے ہیں جس کے لیے پولیس اور ایف سی کے 8 ہزار سے زائد اہلکار تعینات کیے گئے ہیں،جلوس کی کیمروں سے اور فضائی نگرانی بھی کی جا رہی ہے، شہر میں موٹرسائیکل کی ڈبل سواری پر پابندی اور موبائل فون سروس بند ہے۔

لودھراں میں 10 محرم کو 36 جلوس برآمد ہوں گے، 7 جلوسوں کو حساس قرار  دیا گیا ہے،پولیس کے مطابق شہر میں 30 مجالس ہوں گی جبکہ 3 مجالس کو حساس قرار دیا گیا ہے،

بہاولپور میں مرکزی جلوس امام بارگاہ شیعہ جامع محلہ چاہ فتح خان سے برآمد ہوا ہے،بہاولپور میں یومِ عاشور کے موقع پر 112 جلوس برآمد ہوں گے اور 32 مجالس عزا ہوں گی۔

جھنگ میں تعزیے کا مرکزی جلوس امام بارگاہ حسینیہ دربار گوہر شاہ سے برآمد ہو گیا،ٹوبہ ٹیک سنگھ میں 78 جلوس اور 13 مجالس ہوں گی، علم و ذوالجناح کا مرکزی ماتمی جلوس امام بارگاہ حسینیہ سے صبح 10 بجے برآمد ہو گا۔