ترکیہ کے صدر طیب اردگان کی دوران انٹرویو طبیعت ناساز

(ویب ڈیسک ) ترکیہ کے صدر رجب طیب اردگان کی دوران انٹرویو طبیعت ناساز ہو گئی جس پر وہ انٹرویو ادھورا چھوڑ کر چلے گئے۔
غیر ملکی میڈیا رپورٹس کے مطابق ان دنوں ترکیہ میں 14 مئی کے پارلیمانی وصدارتی انتخابات کی مہم جاری ہے، اسی دوران صدر رجب طیب اردگان نے گزشتہ روز دو ٹی وی چینلز کو مشترکہ انٹرویو دیا۔
ترک صدر کا انٹرویو 90 منٹ تاخیر سے شروع ہوا اور پھر انٹرویو شروع ہونے کے 10 منٹ بعد ترک صدر کی طبیعت ناساز ہونے پر چینل کو انٹرویو روکنا پڑا، 15 منٹ بعد جب صدر واپس آئے تو انہوں نے ناظرین سے معذرت کی اور سوالات کے جواب دیئے۔

Erdoğan yayındayken neden eyvah eyvah sesleri geldi? neler oldu acaba! pic.twitter.com/qMVYFkZe22

— TÜRKİYE GERÇEKLERİ (@MstSelanik) April 25, 2023

رجب طیب اردگان کا کہنا تھا کہ انہوں نے کل اور آج کے دن سخت محنت کی تھی اسی وجہ سے پیٹ میں تکلیف ہوئی، پروگرام منسوخ کرنا مناسب نہیں سمجھا۔
واضح رہے کہ رجب طیب اردگان اور ان کی جماعت گزشتہ 20 سالوں سے اقتدار میں ہے، اس مرتبہ صدارتی انتخاب میں اپوزیشن لیڈر کمال قلیچ دار اوغلو ان کے مدمقابل ہیں،سروے رپورٹس کے مطابق اس بار صدر اردگان کو سخت مقابلے کا سامنا ہے۔

یہ بھی پڑھیں: ایرانی سپریم لیڈر کے سابق نمائندے اور معروف عالم دین قاتلانہ حملے میں جاں بحق