چاند نظر نہیں آیا۔۔سعودی عرب میں عید جمعرات کو ہوگی

 (24 نیوز)سعودی عرب میں شوال کا چاند نظر نہیں آیا۔ عیدالفطر 13 مئی جمعرات کو ہوگی۔ 
عرب اخبار سعودی گزٹ نے سماجی رابطے کی ویب سائٹ پر ٹوئٹ کرتے ہوئے سعودی عرب میں شوال کا چاند نظر آنے سے متعلق خبر کی تصدیق کی۔
 ادھر پاکستان میں عید الفطر کا چاند دیکھنے کے لئے مرکزی رویت ہلال کمیٹی کا اجلاس 12 مئی کو طلب کر لیا گیا ۔ مولانا عبدالخبیر آزاد نے بتایا کہ زونل کمیٹیوں کے اجلاس صوبائی ہیڈکوارٹرز میں ہوں گے، عیدالفطر کے چاند کے لئے پورے ملک سے شہادتیں اکٹھی کی جائیں گی، عیدالفطر کا اعلان شہادت کے مطابق کیا جائے گا۔
ادھر وفاقی وزیر اطلاعات و نشریات فواد چودھری نے ایک مرتبہ پھر وقت سے پہلے ہی عیدالفطر کی تاریخ کا اعلان کردیا، فواد چودھری نے اپنے ایک بیان میں کہا کہ وزارت سائنس و ٹیکنالوجی کے کیلنڈر اور ایپلی کیشن کے تحت چاند 13 مئی کو نظر آئے گا اور عید 14 مئی کو ہو گی۔
واضح رہے کہ اس سے قبل انہوں نے رمضان کے آغاز کا بھی اعلان کیا تھا تاہم اس وقت ان کے پاس وزیر سائنس اینڈ ٹیکنالوجی کا منصب تھا جو حال ہی میں ان سے لے کر شبلی فراز کو دیا گیا تھا۔ دوسری جانب محکمہ موسمیات کا کہنا ہے کہ 12 مئی بروز بدھ کو شوال کا چاند نظر آنے کا کوئی امکان نہیں، اس بار 29 کی بجائے 30 روزے پورے ہونے کا امکان ہے اور عید الفطر 14 مئی بروز جمعہ کو ہوسکتی ہے۔واضح رہے کہ کچھ روز قبل جامعہ کراچی کے انسٹیٹیوٹ آف اسپیس سائنس اینڈ ٹیکنالوجی کے سربراہ پروفیسر جاوید اقبال نے بھی پیشگوئی کی تھی کہ پاکستان میں 30 روزے پورے اور عید الفطر 14 مئی جمعہ کو ہوگی۔
یہ بھی پڑھیں۔مسجد اقصیٰ پر حملے قابل مذمت ۔۔ عالمی برادری مظالم بند کرائے۔۔پاکستان