عوام کا مفاد سب سے مقدم ہے، وسائل پر پہلا حق مقامی آبادی کا ہے، سرفراز بگٹی

(ویب ڈیسک)  وزیر اعلیٰ بلوچستان نے سکالرشپ، سوئی میں گیس کی عدم فراہمی اور ملازمتوں میں سست روی پر سخت برہمی کا اظہار کرتے ہوئے کہا عوام کا مفاد سب سے مقدم ہے، وسائل پر پہلا حق مقامی آبادی کا ہے۔
وزیر اعلیٰ بلوچستان سرفراز بگٹی کی زیر صدارت پی پی ایل انتظامیہ اور صوبائی حکومت کا اجلاس ہوا جس میں صوبائی حکومت اور پی پی ایل انتظامیہ کے مابین طے معاہدے پر پیش رفت کا جائزہ لیا گیا ہے۔

سرفراز بگٹی نے کہا سوئی سے نکلنے والی گیس سے سوئی ٹاؤن کے باسی کا محروم ہونا افسوسناک ہے، آج بھی سوئی کی خواتین لکڑیوں پر روٹی پکانے پر مجبور ہیں جبکہ پی پی ایل معاہدے کے باوجود وعدوں پر عملدرآمد نہ ہونا تشویشناک ہے۔

انہوں نے کہا سکالرشپس، سن کوٹہ اور مقامی بھرتیوں میں تاخیر ہونا اور ویل چوکیدار کی پوسٹوں پر مقامی افراد کی بھرتی میں حیل و حجت نا قابل قبول ہے ، جب تک معاہدے پر مکمل عملدرآمد نہیں ہوگا، نئے معاہدے نہیں ہوں گے۔

 یہ   بھی پڑھیں:ماہرہ خان کا  حیران کن  انکشاف

سرفراز بگٹی نے سن کوٹہ کے تحت خالی آسامیوں پر فوری مقامی بھرتی کی ہدایت کی ہے جبکہ مقررہ ٹائم لائن میں عملی پیش رفت نہ ہوئی تو دیگر آپشنز زیر غور لانے کا عندیہ بھی دیا ہے۔

پی پی ایل حکام کی جانب سے گیس فراہمی کا 80 فیصد کام مکمل ہونے اور تمام زیر التواء امور کو جلد از جلد نمٹا کر عوامی مسائل و مشکلات کا ادراک کیے جانے کی یقین دہانی بھی کرائی ہے۔