پہلا نشان حیدر کا اعزاز ،کیپٹن سرورکا یوم شہادت آج منایا جا رہا ہے

 (24 نیوز) پہلے نشان حیدر کا اعزاز حاصل کرنیوالے کیپٹن محمد سرورکا یوم شہادت آج منایا جا رہا ہے، شہید نے مادر وطن کے دفاع میں کمال بہادری اور جرات کا مظاہرہ کیا۔

تفصیلات کے مطابق قوم کے عظیم سپوت نے 27 جولائی 1948 کو کشمیر کے اوڑی سیکٹر میں جام شہادت نوش کیا، یوم شہادت پر تقریب کا انعقاد کیا گیا جس میں گارڈ آف آنر پیش کیا گیا،کشمیر کی وادیاں آج بھی کیپٹن محمد سرور کی شجاعت اور جوانمردی کی گواہ ہیں کہ کس طرح کیپٹن محمد سرور اپنے خون کے آخری قطرے تک لڑے تھے۔

شہید کیپٹن محمد سرور راولپنڈی کے گاؤں سنگھوری میں 10 نومبر 1910 کو پیدا ہوئے، کیپٹن محمد سرور کا تعلق ایک فوجی گھرانے سے تھا، آپ کے والد محمد حیات خان بھی فوج میں تھے۔

کیپٹن محمد سرور شہید نے اپنی ابتدائی تعلیم فیصل آباد کے گورنمنٹ مسلم ہائی سکول طارق آباد سے حاصل کی۔

کیپٹن محمد سرور نے دشمن کی آنکھ میں آنکھ ڈال کر اسے بتایا کہ اس زمین کے لئے وہ خون بہا بھی سکتا ہے اور دشمن کو گرا بھی سکتا ہے۔