پاکپتن میں سیلاب سےگاؤں سوڈا مکمل دریابُرد، ایم 5 موٹر وے ملتان سے جھانگڑا انٹرچینج تک بند

  (ویب ڈیسک )دریائے چناب اور ستلج کے سیلاب سے متاثرہ جلال پور پیر والا شہر سمیت درجنوں بستیوں میں پانی اب بھی موجود ہیں، نوراجہ بھٹہ کے مقام پر شگاف بند کرنے کا کام جاری ہے۔

موٹر وے پولیس کے مطابق سیلاب سے متاثرہ ایم 5 موٹر وے 13ویں روز بھی ملتان سے جھانگڑا انٹرچینج تک بند ہے، بحالی کے لیے پانی اترنے کا انتظار کیا جارہا ہے۔

پاکپتن میں دریائے ستلج سے زمینی کٹاؤ کا عمل جاری ہے، گاوں سوڈا مکمل دریا بُرد ہوگیا ، چک باقر کے 50 گھر بھی کٹاؤ کی زد میں آگئے۔

کوٹری بیراج پر درمیانے درجے کی سیلابی صورتِ حال

دوسری جانب دریائے سندھ میں کوٹری بیراج پر درمیانے درجے کی سیلابی صورتِ حال برقرار ہے۔

ٹھٹہ سجاول پل پر پانی کی سطح میں اضافہ ہوگیا جس کے نتیجے میں کچےکے 10 سے زائد دیہات زیرِ آب آگئے۔

پانی کی سطح میں اضافے کے باعث کئی ایکڑ  پر کھڑی فصلیں بھی زیرِ آب آگئیں جس کے بعد مکینوں نے حفاظتی بند پر پناہ لے لی۔

مٹیاری میں کچے کے علاقے متاثر

مٹیاری میں کچے کے علاقے بھی متاثر ہو گئے، مکین اپنی مدد آپ کے تحت کشتیوں کے ذریعے نقل مکانی جاری رکھے ہوئے ہیں۔ سعید آباد کے کچے کے علاقے زیرِ آب آنے سے فصلیں بھی متاثر ہوگئیں۔

احمد پور سیال  میں سیلاب کے پانی سے تعفن پھیلانے لگا 

احمد پور سیال کے محلہ امیر پور میں سیلاب کے پانی سے تعفن پھیلانے لگا ،  سیلاب متعدد مکانات تباہ ہوگئے ، اہل محلہ کہتے ہیں سیلابی پانی سےمچھر پرورش پا رہاہے جس سے بیماریاں پھیل رہی ہیں ۔

عارف والا  میں نظام زندگی مفلوج 

عارف والا دریاۓ ستلج کے سیلاب زدہ علاقوں میں نظام زندگی بری طرح مفلوج ہو کر رہ گیا، متعدد دیہات کے زمینی رابطے تاحال بحال نہ ہوسکے جبکہ سیلابی پانی سے سڑکیں بہہ جانے سے مکینوں کو آنے جانے میں دشواری کا سامنا ہے ۔