ٹیم ورک کی بدولت ہم کسی بھی کام کو بہتر انجام دے سکتے ہیں: عارف علوی

(24 نیوز) صدر مملکت ڈاکٹر عارف علوی کا کہنا ہے کہ سرکاری افسران عوام کی خدمت کرنے میں کوئی کسر اٹھا نہ رکھیں، ٹیم ورک کی بدولت ہم کسی کام کو بہتر انجام دے سکتے ہیں۔

صدر مملکت ڈاکٹر عارف علوی نے کہا ہے کہ سرکاری افسران عوام کی خدمت کرنے میں کوئی کسر اٹھا نہ رکھیں، ٹیم ورک کی بدولت ہم کسی کام کو بہتر طور پر انجام دے سکتے ہیں،ہم نے جمہوریت کیلئے بہت جدو جہد کی ہے۔ان خیالات کااظہار انہوں نے جمعہ کے روز یہاں سول سروسز اکیڈمی میں  46ویں سپیشلائزڈ ٹریننگ پروگرام کے تحت تربیت مکمل کرنے والے  پاکستان ایڈمنسٹریٹو سروس کے 46افسران میں ایوارڈ زو اسناد تقسیم کرنے کی تقریب سے خطاب کرتے ہوئے کیا۔

یہ بھی پڑھیں: سپریم کورٹ شام کو ایک بار پھر کھل گئی

اس موقع پر سول سروسز اکیڈمی کے ڈائریکٹر جنرل فرحان عزیز خواجہ بھی موجود تھے تربیت مکمل کرنے والوں میں پنجاب، سندھ اور بلوچستان سمیت تمام صوبوں کے افسران شامل تھے۔

تقریب سے خطاب کرتے ہوئے ڈاکٹر عارف علوی نے کہا کہ ایڈمنسٹریٹو افسران کو انسانیت کی خدمت کر نا سکھایا جا تا ہے، ایڈمنسٹرٹیو افسران کو شیروانی میں دیکھ کر خوشی ہو ئی، آپ خودکو منظم کریں اور خوشی کا کوئی لمحہ ہاتھ سے نہ جانے دیں،آپ خوش ہوں گے توآپ کاخاندان بھی خوش ہو گا ۔

انہوں نے تربیت مکمل کرنے والے افسران کیلئے نیک خواہشات کا اظہارکرتے ہوئے کہاکہ وہ لوگوں کیلئے آسانیاں پیدا کریں، آج کا دن تربیت مکمل کرنے والے افسران کیلئے ایک عظیم دن کی حیثیت رکھتا ہے، جو انہیں پوری زندگی یاد رہے گا۔

صدر مملکت  نے سرکاری افسران پر زور دیا کہ وہ اپنے اپنے شعبوں میں عوام کی خدمت کرنے میں کوئی کسر اٹھا نہ رکھیں ،عوامی فلاح و بہبود اور انہیںریلیف کی فراہمی کیلئے عوام دوست پالیسیاں تشکیل دیں تا کہ عام آدمی کے مسائل فوری حل ہو سکیں، آپ سول سرونٹس ہونے کے ناطے معاشرے کی بہتر اصلاح اور ملک و قوم کی ترقی کیلئے ہمہ وقت کوشاں رہیں کیونکہ عوام کی امیدیں آپ سے وابستہ ہیں۔

یہ بھی پڑھیں:سابق لیگی رہنما اور گورنر کا الیکشن آزاد حیثیت میں لڑنے کااعلان

انہوں نے افسران سے مخاطب ہو کر کہا کہ سول سرونٹس ملکی مشینری کا کلیدی حصہ ہیں جس کے بغیر ملک آگے بڑھ سکتا ہے اور نہ ہی معاشرے کی حقیقی معنوں میں اصلاح ممکن ہے لہذا آپ دلجمعی ، تندہی اور محنت کے ساتھ مہذب معاشرے کی تشکیل میں اپنا بھرپور کردار ادا کریں۔

صدر مملکت نے حضور ﷺ کی سیرت طیبہ،خلفا ئے راشدین کے طرز حکمرانی اور قرآنی آیات کا حوالہ دیتے ہوئے افسران پر زور دیا کہ وہ عام انسان کیلئے آسانیاں پیدا کریں اور اپنے دروازے عوام کیلئے کھلے رکھیں، دوسروں کے ساتھ تعاون  کئے بغیر آپ خوش نہیں رہ سکتے، خوشی کیلئے ہر لمحے کو تلاش کرواور اس کیلئے مسلسل کوشش کرنی پڑتی ہے، دنیا کے اندر نفرتیں عروج پر جبکہ محبتوں کا فقدان ہے چھوٹے چھوٹے عیب ظاہر کیے جاتے ہیں ۔

انہوں نے دریا اور سمندر کی مثال دیتے ہوئے کہا کہ دریازمین کو سیراب کرتا ہے جبکہ سمندرمیں سب کچھ گھل مل جاتا ہے، سب سے پہلے اپنے آپ سے محبت کریں ،دوسروں کے بارے میں دل سے نفرتیں نکالیں ،خاندان سے محبت کاسفر شروع کریں جو پڑوسیوں ،قوم اور انسانیت سے ہوتا ہوا اللہ سے محبت پر جاکر ختم ہو۔

صدر مملکت نے کہا کہ آپ کا لائف سٹائل ایسا ہو کہ لوگ آپ کے قریب آسکیں اپنی ڈیوٹی کے علاقوں میں جمعہ کی نماز پڑھائیں یا پڑھیں اس سے لوگوں سے ملاقات کرکے فاصلے کم کیے جاسکتے ہیں، انسانیت سے پیارکرنے  کے حوالے سے صدر مملکت نے علامہ اقبال اور مولانا جلال الدین رومی کی حکا یات کا بھی ذکر کیا۔

یہ بھی پڑھیں: پیپلز پارٹی، ن لیگ ،آئی پی پی اور مسلم لیگ ق ایک ہو گئیں

آخر میں انہوں نے کورس مکمل کرنے والے افسران کو مبارکباد دی اور امید ظاہر کی کہ کورس مکمل والے تمام افسران اپنے اپنے شعبہ جات میں بہترین خدمات انجام دیں گے اور عوام کو ریلیف کی فراہمی کیلئے ٹھوس اور پائیدار پالیسیاں تشکیل دیں گے۔

تقریب میں صدر مملکت نے دوران تربیت نمایا ںکارکردگی کا مظاہرہ کرنے والے افسران میں شیلڈ تقسیم کیں ،بہترین سپورٹس پرسن کا ایوارڈ آفتاب منیر اور خواتین میں ایمان ظفر ،بہترین ہارس رائیڈر کا ایوارڈ کیپٹن ریٹائرڈ فرید بادینی،بہترین کنڈکٹ کا ایوارڈ سنبل جاوید جبکہ بہترین اکیڈمک کاایوارڈ احسن نواز گوندل کو دیا گیا، نصابی و غیر نصابی سرگرمیوں میں بہترین کارکردگی کا مظاہرہ کرنے پر سلمان یوسف کو گولڈ میڈل سے نوازا گیا۔