ٹک ٹاک نے پاکستانی ٹک ٹاکرز کو بڑا جھٹکا دے دیا

(24 نیوز )ویڈیو اور انٹر ٹینمنٹ  ایپ ٹک ٹاک نے پاکستانی ٹک ٹاکرز کو عید سے قبل ہی بڑا جھٹکا دے دیا۔

تفصیلات کےمطابق مقبول ترین سوشل میڈیا ایپ ٹک ٹاک نے 3 ماہ کے دوران پاکستانی صارفین کی سوا کروڑ ویڈیوز ڈیلیٹ کر دی ہیں ، ٹک ٹاک نے اکتوبر سے دسمبر 2022 کے دوران پاکستانی صارفین کی سوا کروڑ سے زائد ویڈیوز حذف کر دی ہیں، واضح رہے کہ ٹک ٹاک پر روزانہ ہی کروڑوں ویڈیوز اپ لوڈ ہوتی ہیں جن کے مواد کی جانچ پڑتال کمیونٹی گائیڈ لائنز کے اصولوں کے تحت ہوتی ہے۔

کمپنی نے اکتوبر سے دسمبر 2022 کے دوران کمیونٹی گائیڈ لائنز کے اصولوں کی خلاف ورزی کرنے والی ویڈٰیوز کے خلاف کارروائی کے بارے میں ایک رپورٹ میں بتایا، رپورٹ کے مطابق ٹک ٹاک نے اکتوبر سے دسمبر 2022 کے دوران دنیا بھر میں 8 کروڑ 56 لاکھ 80 ہزار سے زیادہ ویڈٰیوز کو کمیونٹی گائیڈ لائنز کی خلاف ورزی پر پلیٹ فارم سے ہٹایا،یہ تعداد اس عرصے میں ٹک ٹاک پر پوسٹ کی جانے والی مجموعی ویڈیوز کے 0.6 فیصد کے برابر ہے۔

پاکستان میں اس عرصے کے دوران ایک کروڑ 26 لاکھ 28 ہزار سے زیادہ ویڈیوز کو حذف کیا گیا،کمپنی نے بتایا کہ کمیونٹی گائیڈ لائنز کی خلاف ورزی کرنے والے مواد کو حذف کرنے کے ساتھ ساتھ اسپام قرار دیے گئے اکاؤنٹس اور ان کی جانب سے پوسٹ کی گئی ویڈیوز بھی حذف کی گئیں ، اکتوبر سے دسمبر 2022 کی سہ ماہی کے دوران پاکستان میں، 89.7 فیصد ویڈیوز کسی صارف کی جانب سے دیکھے جانے سے پہلے حذف کی گئیں۔