اغوا،زیادتی کے متعدد واقعات،ہوش اڑا دینے والی رپورٹ میں بڑے انکشافات

(ویب ڈیسک)جولائی میں پاکستان بھر میں 133 خواتین کو اغوا کیا گیا، مزید 133 کو جسمانی طور پر ہراساں کیا گیا اور 85 کو جنسی زیادتی کا نشانہ بنایا گیا جبکہ بچوں کے ساتھ جنسی زیادتی کے 108 واقعات میڈیا میں رپورٹ ہوئے۔
سماجی تنظیم سسٹین ایبل سوشل ڈیولپمنٹ آرگنائزیشن اور سینٹر فار ریسرچ، ڈویلپمنٹ اینڈ کمیونیکیشن کی تحقیقاتی رپورٹ کے مطابق  جولائی 2022 میں  میڈیا میں خواتین کا اغوا، خواتین پر جسمانی حملہ اور بچوں کے ساتھ جنسی زیادتی کے واقعات سب سے زیادہ رپورٹ ہوئے۔ مسلسل تیسرے مہینے، خواتین کے اغوا کے واقعات میڈیا میں سب سے زیادہ رپورٹ ہوئے، جن کی کل تعداد 133 تھی۔ ان میں سے 93 کیسز صرف صوبہ پنجاب سے رپورٹ ہوئے۔ دوسرے صوبوں پر نظر ڈالیں تو سندھ سے  20 کیسز رپورٹ ہوئے اس کے بعد اسلام آباد سے 15جبکہ خیبر پختونخوا اور بلوچستان میں بالترتیب 3 اور 2 کیسز رپورٹ ہوئے۔

اسی طرح خواتین پر جسمانی تشدد کے 133 واقعات رپورٹ ہوئے جن میں گزشتہ ماہ کی نسبت  اضافہ دیکھنے میں آیا ۔ ان میں سے زیادہ تر کیسز صوبہ پنجاب سے تھے، جن کی تعداد77 تھی، اس کے بعد سندھ میں 34 ، کے پی سے 16، اسلام آباد سے 6 جبکہ بلوچستان سے کوئی کیس سامنے نہیں آیا۔

ضرور پڑھیں:شہباز گل کی میڈیکل رپورٹ میں اہم انکشافات
صوبہ پنجاب میں گھریلو تشدد کے 58 واقعات رپورٹ ہوئے جو تمام صوبوں میں سب سے زیادہ ہیں۔ صوبہ سندھ میں 17 اورخیبر پختونخوا ہ میں  15 کیسز رپورٹ ہوئے جبکہ اسلام آباد میں 4 اور بلوچستان میں گھریلو تشدد کے صفر کیس رپورٹ ہوئے۔ اس طرح جولائی میں  مجموعی طور پر 94 کیسز سامنے آئے، جو پچھلے مہینے کے مقابلے میں قدرے کم ہیں۔

میڈیا میں اس ماہ ریپ کے   85 واقعات کے بارے میں لکھا گیا جو کہ گزشتہ ماہ سے قدرے کم ہے  ۔صوبہ پنجاب میں ایک بار پھر ریپ کے سب سے زیادہ47 کیسز رپورٹ ہوئےاس کے بعد سندھ میں 16 ، خیبر پختونخواہ  سے 11، اسلام آباد سے 10 اور بلوچستان سے صرف ایک کیس سامنے آیا۔غیرت کے نام پر قتل کے واقعات میں مجموعی طور پر 7 خواتین اپنی جانوں سے ہاتھ دھو بیٹھیں۔ سندھ میں 4 اور پنجاب میں 3 واقعات سامنے آئے ۔ اسی طرح ملک میں کام کی جگہ پر ہراسانی  کے بھی  7 واقعات رپورٹ ہوئے، جن میں  پنجاب سے 5اور  2 سندھ سے ہیں۔

بچوں کے خلاف تشدد کے تمام اشاریوں میں، سب سے زیادہ پھیلاؤ بچوں کے خلاف جنسی زیادتی کا تھا، جہاں ملک بھر میں کل 108 کیسز رپورٹ ہوئے، جن میں پنجاب 42 کیسز کے ساتھ سرفہرست، اس کے بعد کے پی میں 32 اور سندھ میں 21 کیسز رپورٹ ہوئے۔ اسلام آباد سے 10  اور بلوچستان سے سب سے کم تعدد   3 واقعات  رپورٹ ہوئے۔جولائی کے مہینے میں پاکستان بھر سے 82 بچے اغوا ہوئے،چائلڈ لیبر کے 9 اور بچوں کی شادی کے 6 کیسزمیڈیا میں رپورٹ کیے گیے۔