ڈینٹل کونسل کا ملک گیر ڈیجیٹل انسپکٹر ٹریننگ پروگرام شروع کرنے کا فیصلہ

(بابرشہزاد ترک)پاکستان میڈیکل اینڈ ڈینٹل کونسل (پی ایم اینڈ ڈی سی) نے ملک گیر ڈیجیٹل انسپکٹر ٹریننگ پروگرام شروع کرنے کا فیصلہ کیا ہے، اس حوالے سے تمام تیاریاں مکمل کر لی گئی ہیں۔

 پی ایم اینڈ ڈی سی اسلام آباد میں ایک اہم اجلاس منعقد ہوا، جس میں 9 سے 11 دسمبر 2025 تک ہونے والی قومی تربیت کے انتظامات، فریم ورک اور تکنیکی تقاضوں کو حتمی شکل دی گئی۔

 اجلاس کی صدارت صدر پی ایم اینڈ ڈی سی نے کی، جبکہ ملک بھر سے آنے والے 12 ماسٹر ٹرینرز نے تربیتی ماڈیول، ڈیجیٹل انسپکشن ورک فلو، آلات کے استعمال، تربیتی مواد اور اسیسمنٹ ٹولز کا تفصیلی جائزہ لیا۔

 اجلاس میں اس بات پر زور دیا گیا کہ اس تربیتی پروگرام کا مقصد انسپکٹرز کو مکمل ڈیجیٹلائزڈ اور شفاف انسپکشن سسٹم کے تقاضوں سے ہم آہنگ کرنا ہے تاکہ میڈیکل اور ڈینٹل کالجز کی نگرانی جدید عالمی معیار کے مطابق ممکن بنائی جا سکے۔

  دستاویزی پروٹوکولز، انسپکٹر گائیڈ، ڈیجیٹل پلیٹ فارم، رپورٹنگ میکانزم اور انسپکشن کے یکساں طریقہ کار کی منظوری بھی دی گئی، پی ایم اینڈ ڈی سی کے مطابق ڈیجیٹل انسپکشن سسٹم نہ صرف انسانی غلطیوں میں کمی لائے گا بلکہ معیاری نگرانی، شفافیت اور اداروں کی کارکردگی کے مؤثر جائزے کو بھی یقینی بنائے گا۔

 ادارے نے اس عزم کا اظہار کیا کہ ملک بھر کے انسپکشن سسٹم کو جدید خطوط پر استوار کرنا پی ایم اینڈ ڈی سی کی اولین ترجیح ہے، اور یہ قومی تربیتی پروگرام اس سمت میں ایک اہم سنگ میل ثابت ہو گا۔

یہ بھی پڑھیں :پاکستان میں سیاحت کے شعبے میں سرمایہ کاری کے وسیع مواقع ہیں،عطاء اللہ تارڑ