بیلاروسی شہری کی مکمل برف سے بنی فعال کشتی کی تصاویر وائرل

(ویب ڈیسک) بیلا روسی شہری کی جانب سے برف سے بنی پانی پر تیرتی ہوئی مکمل فعال کشتی کی تصاویر سوشل میڈیا پر وائرل ہو گئیں۔

بیلاروس سے تعلق رکھنے والے ایک آرٹسٹ نے مکمل طور پر برف سے بنی ایک کشتی بنائی ہے جو کہ نہ صرف ایک فرد کیلئے کافی ہے بلکہ پانیوں میں سفر بھی کرسکتی ہے۔

میڈیا رپورٹس کے مطابق ایوان کارپٹسکی بیلاروس سے تعلق رکھنے والے ایک خود ساختہ آرٹسٹ ہیں اور وہ اپنے ملک میں برف کی مدد سے مجسمہ سازی کے شوق کے لیے جانے جاتے ہیں، اس کا نام پہلی بار بیلاروس کے اخبارات میں 2020 میں شائع ہوا جب ان کے آئس وائلن کی تصاویر پہلی بار سوشل میڈیا پر وائرل ہوئیں، اس کے بعد سے وہ ہر موسم سرما میں مصروف ہوجاتے اور مزید متاثر کن فن پارے متعارف کرواتے تاہم اس سال انہوں نے مکمل طور پر برف سے بنی خوبصورت کشی متعارف کرواکر سب کو حیران کردیا ہے۔

یہ بھی پڑھیں: سیکنڈ کا دوبارہ تعین کرنے والی گھڑی ایجاد، کارنامہ کن سائنس دانوں نے سر انجام دیا؟

کشتی کی تصاویر اور ویڈیوز ایوان نے اپنے انسٹاگرام پیج پر پوسٹ کیں جہاں برف کے نقش و نگار والے بلاکس کو دکھایا گیا ہے اور کسطرح انہیں ایک دوسرے میں ضم کرکے شاہکار تخلیق کیا گیا ہے۔

کشتی کو دارالحکومت منسک سے منسلک Tsnyanskoe نامی جھیل کے قریب بنایا گیا ہے جو منسک کے شمال میں واقع Tsna-Yodkovo گاﺅں کے قریب ہے۔