ضمنی الیکشن میں ن لیگ کی کامیابی قیادت پر اعتماد کا ثبوت ہے: ماریہ طلال

(24نیوز)رکن پنجاب اسمبلی اور مسلم لیگ ن کی رہنما ماریہ طلال نے کہا کہ ضمنی الیکشن میں ن لیگ کی کامیابی اس بات کا ثبوت ہے کہ عوام آج بھی قیادت پر بھرپور اعتماد رکھتے ہیں۔ انہوں نے کہا کہ یہ نتائج واضح کرتے ہیں کہ لوگ ووٹ صرف نعروں یا جذبات پر نہیں دیتے، وہ کارکردگی اور مسلسل خدمت کو دیکھ کر فیصلہ کرتے ہیں۔

مسلم لیگ ن کی رہنما ماریہ طلال نے کہا کہ عوام نے میاں محمد نواز شریف کے وژن، منصوبہ بندی اور عملی کارکردگی کو پرکھ کر اعتماد دیا جبکہ اسی سفر کو میاں شہباز شریف اور مریم نواز نے محنت، لگن اور مؤثر قیادت کے ساتھ آگے بڑھایا۔

 ماریہ طلال نے کہا کہ عوام کے درمیان رہ کر، فیلڈ میں جا کر اور ترقیاتی کاموں کی نگرانی نے لوگوں کے یقین کو مزید مضبوط کیا کہ یہ قیادت وعدوں سے زیادہ عملی خدمت پر یقین رکھتی ہے، اور یہی طرزِ حکمرانی ن لیگ کی اس تاریخی کامیابی کا بنیادی سبب بنا۔