آزمائش کی اس گھڑی میں پاکستان ترکیہ اور اسکے عوام کے ساتھ ہے، وزیراعظم

(ویب ڈیسک) وزیر اعظم شہباز شریف نے ترک صدر رجب طیب اردگان سے زلزلے میں جانی نقصان پر اظہار افسوس کرتے ہوئے کہا ہے کہ پاکستان سے جلد امدادی ٹیمیں ترکی پہنچیں گی۔

تفصیلات کے مطابق وزیراعظم شہباز شریف نے ترک صدر رجب طیب اردگان کو ٹیلی فون کیا، شہباز شریف نے ترک صدر سے زلزلے میں جانی نقصان پر اظہار افسوس کیا۔

شہباز شریف کا کہنا تھا کہ پاکستان سے جلد امدادی ٹیمیں ترکی پہنچیں گی۔

وزیراعظم پاکستان نے مزید کہا کہ آزمائش کی اس گھڑی میں ہم اپنے بھائی ترکیہ اور اس کی عوام کے شانہ بشانہ کھڑے ہیں۔

Deeply saddened by the news of a massive earthquake that struck southeastern region of Türkiye. I send my profound condolences & most sincere sympathies to my brother President @RTErdogan & brotherly people of Türkiye on the loss of precious lives & damage to infrastructure.

— Shehbaz Sharif (@CMShehbaz) February 6, 2023

ترکیہ کے صدر رجب طیب اردوان نے اس ہمدردی اور مدد کی پیشکش پر وزیراعظم شہباز شریف کا شکریہ ادا کیا۔

اس سے پہلے صبح وزیراعظم نے سماجی رابطے کی ویب سائیٹ پر پیغام میں بھی ترکیہ میں زلزلے پر دکھ کا اظہار کیا تھا۔

یہ بھی پڑھیے: ترکیہ اور شام میں تباہ کن زلزلہ،1 ہزار سے زائد افراد جاں بحق

خیال رہے کہ آج صبح 4 بجے ترکیہ کے جنوبی حصوں میں ہولناک ترین زلزلے نے قیامت ڈھا دی جس کی شدت 7.8 ریکارڈ کی گئی۔

زلزلہ شام میں بھی آیا جبکہ یونان، مصر، قبرص، اردن، لبنان، عراق، جارجیا اور آرمینیا میں بھی زلزلے کے جھٹکے محسوس کیے گئے۔

ترکیہ میں زلزلے سے سینکڑوں عمارتیں زمین بوس ہوگئیں اور اب تک 900 سے زائد ہلاکتوں کی تصدیق ہوئی ہے۔

شام میں بھی زلزلے سے اب تک 400 افراد جاں بحق اور 600 سے زائد افراد زخمی ہوئے ہیں۔