تیز ہواؤں اور گرج چمک کے ساتھ بارش کا امکان

(اقصیٰ سجاد) بالائی خیبرپختونخوا، جنوبی پنجاب، کشمیر، گلگت بلتستان اور شمالی بلوچستان میں تیز ہواؤں اور گرج چمک کے ساتھ بارش کا امکان ہے جبکہ ملک کے جنوبی علاقوں میں گردآلود ہوائیں چلنے کی توقع ہے۔

شہر لاہور میں ٹھنڈی ہوائیں چلنے سے شہر کے درجہ حرارت میں کمی، موسم خوشگوار ہوگیا۔محکمہ موسمیات نے آئندہ 24گھنٹوں کے دوران بارش کی پیش گوئی کردی۔  شہر کا موجودہ درجہ حرارت 24ڈگری سینٹی گریڈ ریکارڈ کیا گیا ہے۔ ہوا میں نمی کا تناسب 85فیصد ریکارڈ کیا گیا ہے۔ شہر میں فضائی آلودگی بڑھنے لگی، ائیرکوالٹی انڈیکس 161ریکارڈ کیا گیا ہے جبکہ لاہور دنیا کے آلودہ ترین شہروں کی فہرست میں چوتھے نمبر پر آگیا۔ ماہرین نے شہریوں کو احتیاطی تدابیر اختیار کرنے کی ہدایت دے دی۔

کراچی میں آئندہ 24گھنٹوں کے دوران موسم گرم اور مرطوب رہنےکا امکان ہے۔ محکمہ موسمیات کے مطابق شہر کا کم سے کم درجہ حرارت 24 ڈگری سینٹی گریڈ ریکارڈ ہوا جبکہ زیادہ سے زیادہ درجہ حرارت 34 سے 36 ڈگری سینٹی گریڈ کے درمیان بڑھنے کا امکان ہے۔

 ہوا میں نمی کا تناسب73 فیصد ہے اور 13 کلو میٹر فی گھنٹہ کی رفتار سے ہوائیں چل رہی ہیں۔

دوسری جانب بلوچستان میں بارشیں برسانے والا مغربی ہواؤں کا سسٹم داخل ہوگیا، کوئٹہ سمیت مختلف علاقوں میں موسلادھار بارش سے جل تھل ایک ہوگیا، محکمہ موسمیات نے جمعرات کو صوبے کے 16 اضلاع میں مزید بارشوں کی پیش گوئی کی ہے۔

محکمہ موسمیات کے مطابق مغرب کی جانب سے بارشیں برسانے والا سلسلہ بدھ کو بلوچستان میں داخل ہوگیا جس کی وجہ سے ژوب، شیرانی، بارکھان، موسیٰ خیل، سبی، زیارت، کوئٹہ، چمن، پشین، قلعہ عبداللّٰہ، قلعہ سیف اللّٰہ، قلات اور خضدار میں تیز ہواﺅں، آندھی اور گرج چمک کے ساتھ موسلادھار بارش کا سلسلہ جاری رہا۔

مزید پڑھیں:  ججوں کے خط،نئی عدلیہ بحالی تحریک کے پیچھے کون ہے؟

 بارش کے بعد نشیبی علاقے زیر آب آگئے، محکمہ موسمیات کے مطابق آئندہ 24 گھنٹوں کے دوران ژوب، شیرانی، بارکھان، موسیٰ خیل، کوہلو، سبی، جھل مگسی، لورالائی، زیارت، کوئٹہ، چمن، پشین، قلعہ عبداللّٰہ، قلعہ سیف اللّٰہ، قلات اور خضدار میں تیز ہواؤں، آندھی اور گرج چمک کے ساتھ بارش کا امکان ہے  تاہم صوبے کے دیگر اضلاع میں مطلع ابر آلود رہے گا۔

پاکپتن، خوشاب، ظفر وال، اسکردو اور آزاد کشمیر کے مختلف علاقوں میں بارش ریکارڈ کی گئی۔ اس کے علاوہ دیوسائی سمیت بالائی علاقوں میں برفباری اور شمالی وزیرستان کے مختلف علاقوں میں دوسرے روز بھی وقفے وقفے سے موسلا دھاربارش کا سلسلہ جاری ہے۔

ادھر دانہ سرضلع شیرانی میں بارش سے لینڈ سلائیڈنگ ہوئی جبکہ ژوب ڈی آئی خان روڈ پر ٹریفک معطل ہوگئی۔ محکمہ موسمیات کے مطابق آج خیبر پختونخوا، پنجاب، کشمیر، گلگت بلتستان اور شمالی بلوچستان میں بارش کا امکان ہے۔