ننھے وی لاگر محمد شیراز نے وی لاگنگ کو خیر باد کہہ دیا

(24 نیوز)پاکستان کے سب سے کم عمر اور ننھے وی لاگر محمد شیراز نے مداحوں کے بے حد پیار اور کامیابی حاصل کرنے کے بعد ویلاگنگ کو خیرباد کہہ دیا۔

گلگت بلتستان سے تعلق رکھنے والے ننھے یوٹیوبر  شیراز نے اپنے یوٹوب چینل پر اپنا آخری وی لاگ پوسٹ کیا اور سوشل میڈیا کی دنیا سے کنارہ کشی کا اعلان کیا،شیراز نے اپنی ویڈیو میں کہا کہ "دوستوں آج میں آپ لوگوں سے ایک ضروری بات کرنا چاہتا ہوں،میں آج سے وی لاگ نہیں بناؤں گا۔"

انہوں نے وجہ بتاتے ہوئے کہا کہ " میرے ابو نے کہا ہے کہ اب کچھ عرصہ یہ ویڈیوز بنانا بالکل ختم کردو اور صرف پڑھائی پر توجہ دو۔"

 بہت ہی دکھ کیساتھ شیراز نے کہا کہ "لیکن مجھے تو وی لاگ بنانے کا بہت شوق ہے لیکن میں کیا کروں آج میرا آخری وی لاگ ہے‘ اور یہ کہتے ہوئے وہ بہت اُداس ہوگئے اور انہوں نے اپنی بہن مسکان سے پوچھا کہ کیا آپکو ناظرین یاد آئینگے؟"جس پر مسکان اور شیراز دونوں نے کہا کہ" ہمیں آپ سب بہت یاد آئیں گے۔"

شیراز نے مزید کہاکہ " آپ سب کا بہت شکریہ آپ لوگوں نے مجھے بہت پیار دیا محبت دی،انشااللہ میں جلدی واپس آنے کی کوشش کروں گا۔"

شیراز نے کہا کہ " مجھے بہت لوگ کہہ رہے ہیں کہ میں وی لاگنگ نہ چھوڑوں لیکن ہمیں اپنے ماں باپ کی بات ماننی چاہیے اس لیے جیسا وہ کہہ رہے ہیں میں ویسا ہی کروں گا۔"

وی لاگ کے اختتام میں مسکان اور شیراز ایک دوسرے سے گلے مل کر بہت اُداس ہوگئے اور تمام ناظرین کو خدا حافظ کہہ دیا۔

یہ بھی پڑھیں:قومی اسمبلی، طارق بشیر چیمہ معطل،میڈیا کےویڈیو بنانے پر بھی پابندی عائد

خیال رہے کہ شیراز نے بہت کم وقت میں سب کے دلوں کو جیتا جو اپنی بہن مسکان کے ساتھ روزانہ کی بنیاد پر وی لاگنگ کرتا تھا اور وہ اپنی گاؤں کی زندگی کو دکھاتا تھا، ننھے یوٹیوبر کے وی لاگز کو اس قدر پسند کیا گیا کہ انکے چینل پرلاکھوں سبسکرائبرز ہیں اور بڑی تعداد میں لوگ ان کے وی لاگز کو دیکھتے ہیں۔

اس کے علاوہ  ننھے یوٹیوبرکو  یوٹیوب کی جانب سے  سلور اور پھر گولڈن بٹن سے بھی نوازا گیا۔