اے سی استعمال کرتے وقت بل بڑھانے والی غلطی 

(ویب ڈیسک) اے سی استعمال کرتے ہوئے عام طور سے لوگ بل بڑھانے والی یہ عام غلطی کر بیٹھتے ہیں، یہ ایسی غلطی ہے جو بجلی کے بل میں نمایاں اضافہ کر دیتی ہے۔ 

گرمیوں کا موسم تیزی سے بڑھتا چلا آ رہا ہے، دوسری طرف آئی ایم ایف کے کہنے پر بجلی کے بلوں میں بھی ہوش ربا اضافے نے عوام کو پہلے ہی نڈھال کر رکھا ہے، ایسے میں ایئر کنڈیشنر کا استعمال اگر احتیاط سے نہ کیا جائے تو بجلی بل کہیں سے کہیں پہنچ سکتا ہے۔

عام طور پر لوگ کمرے کو ٹھنڈا کرنے کے لیے اے سی کا درجہ حرارت نمایاں حد تک کم کر دیتے ہیں، لیکن اس سے مقصد حاصل نہیں ہوتا۔

اگر آپ اے سی کا درجہ حرارت اس توقع کے ساتھ 26 ڈگری سے کم کر کے 16 ڈگری کرتے ہیں کہ اس سے کمرہ جلد ٹھنڈا ہو جائے گا تو آپ کو معلوم ہونا چاہیے کہ ایسا نہیں ہوتا، کیوں کہ اے سی عموماً یکساں رفتار سے کمرے کو ٹھنڈا کرتے ہیں۔

درجہ حرارت کو 26 سے 16 ڈگری کرنے کا مطلب یہ ہوتا ہے کہ اے سی کو زیادہ وقت تک کام کرنا پڑے گا، جس کے نتیجے میں بجلی کے بل میں اضافہ ہو جائے گا۔

دراصل اے سی کا تھرمو اسٹیٹ مطلوبہ درجہ حرارت پر پہنچنے کے بعد ہی کمپریسر کو بند کرتا ہے، جب درجہ حرارت کم کیا جاتا ہے تو کمپریسر کو مطلوبہ درجہ حرارت تک پہنچنے کے لیے زیادہ وقت تک چلنا پڑتا ہے۔

مزید پڑھیں:  اسلام آباد ہائیکورٹ نور مقدم کیس میں مجرمان کی اپیلوں پر فیصلہ آج سنائے گی

اس طرح صرف بجلی کے بل میں اضافہ نہیں ہوتا بلکہ اے سی سسٹم کی زندگی کی مدت بھی گھٹ جاتی ہے، لہٰذا یہ جان لیں کہ اے سی کے درجہ حرارت کو کم کرنے کی بجائے اسے بڑھانے سے بجلی کے بل میں کمی لانا ممکن ہے۔