امریکا، ایران امن معاہدے کا مجوزہ مسودہ سامنے آگیا

( ویب ڈیسک )عرب میڈیا نے امریکا اور ایران کے درمیان ممکنہ امن معاہدے کے مجوزہ حتمی مسودے کی تفصیلات جاری کر دی ہیں، جس میں جنگ بندی کو مزید 60 روز تک بڑھانے اور آبنائے ہرمز کو دوبارہ کھولنے کی تجویز شامل ہے۔

 رپورٹس کے مطابق مجوزہ معاہدے کے تحت امریکا ایران پر عائد پابندیاں اور ناکہ بندی ختم کرے گا، جبکہ دونوں ممالک جنگ بندی کی توسیعی مدت کے دوران ایران کے افزودہ یورینیئم پروگرام سے متعلق مذاکرات جاری رکھیں گے۔

مسودے میں تمام فریقوں کو فوری طور پر جارحانہ فوجی کارروائیاں روکنے کا پابند بنانے کی تجویز دی گئی ہے، جبکہ معاہدے پر عمل درآمد کے دوران کسی بھی قسم کے فوجی حملے سے گریز کیا جائے گا۔

 یہ بھی پڑھیں:امریکہ ، ایران معاہدہ ! تقریب کہاں ہو گی؟ بڑی خبر آگئی

 دستاویز کے مطابق جنگ بندی کی خلاف ورزی کی صورت میں تنازع کو ثالثی اور رابطہ کاری کے ایک متفقہ نظام کے ذریعے حل کیا جائے گا۔

رپورٹس میں یہ بھی دعویٰ کیا گیا ہے کہ حالیہ ہفتوں کے دوران پاکستان کی ثالثی میں امریکا اور ایران کے درمیان امن تجاویز کا تبادلہ ہوا ہے اور جنگ کے خاتمے کے لیے مفاہمتی یادداشت کو حتمی شکل دینے کی کوششیں جاری ہیں۔