امریکہ اور اسرائیل ایک مرتبہ پھرایران پرجنگ مسلط کرنےکےدرپےہیں؛ایرانی سفیر رضاامیری مقدم

 (انور عباس)پاکستان میں ایرانی سفیر رضا امیری مقدم نے کہا ہے کہ امریکہ اور اسرائیل ایک مرتبہ پھر ایران پر جنگ مسلط کرنے کے درپے ہیں اگر ایسا ہوا تو خطے کے دیگر ممالک بھی مستقبل میں ان سے محفوظ نہیں رہیں گے دوبارہ جنگ ہوئی تو ایران ایک بار پھر سرخرو ہوگا وگرنہ دوسری صورت میں ہم شہادت کا اعلی مقام پائیں گے۔ 

ایرانی سفارت خانہ میں شہداء امت اسلامی کے عنوان سے سیمینار کا انعقاد کیا گیا،تقریب سے خطاب کرتے ہوئے ایران کے سفیر رضا امیری مقدم کا کہنا تھا کہ امریکہ و اسرائیل کےخلاف جنگ میں بھرپور حمایت پر پاکستانی حکومت،عوام اور مختلف سیاسی و مذہبی جماعتوں کے مشکور ہیں۔

ان کا کہنا تھا کہ امریکہ و اسرائیل اس خطے کو دوبارہ خاک و خون میں تبدیل کرنا چاہتے ہیں اگر ایسا ہوا تو خطے کے دیگر ممالک بھی مستقبل میں ان سے محفوظ نہیں رہیں گے،اللہ کا شکر ہےکہ ایران اسرائیلی و امریکی مسلط شدہ جنگ سے باعزت سرخرو ہو کر نکلااگردوبارہ جنگ ہوئی تو ایران ایک بار پھر سرخرو ہوگا وگرنہ دوسری صورت میں ہم شہادت کا اعلی مقام پائیں گے،انہوں نے کہا کہ پاکستان نے امریکہ و اسرائیل کے خلاف جنگ میں ایران کا ساتھ دیا اس جنگ میں بھرپور حمایت پر پاکستانی حکومت، عوام اور مختلف سیاسی و مذہبی جماعتوں کا مشکور ہوں۔

سابق وفاقی وزیر علی محمد خان کا کہنا تھا کہ مئی 2025 میں پاکستان نے برائی کے ایک اور مرکز بھارت کو اس کی جارحیت پر بھرپور جواب دیا، جیسے ایران نے اسرائیل کو منہ توڑ جواب دیا ویسا ہی جواب پاکستان نے بھارت کو دیا۔

 علی محمد خان نے واضح کیا کہ ایران پر حملے میں تمام پاکستانی بلا تفریق مسلک ایران کے ساتھ کھڑے ہوئے ،قائد اعظم کے طلبا کو اپنے اندر مجاہدانہ روح بیدار کرنے کا پیغام آج بھی غزہ، فلسطین، لبنان اور مقبوضہ کشمیر کے مجاہدین کے لئے زندہ ہے، حضرت حمزہ ر سے شروع شہداء کا قافلہ گذشتہ ہفتے شہید ہونے والے حماس ترجمان شہید ابو عبیدہ تک جاری ہے۔

جماعت اہل حرم کےمفتی گلزار نعیمی نے کہا کہ قاسم سلیمانی سمیت مقاومت کو زندہ رکھنے والے امت مسلمہ کے تمام شہداءکو خراج عقیدت پیش کرتے ہیں،مجلس وحدت مسلمین کے ناصر شیرازی کا کہنا تھا کہ آج امت مسلمہ کے بہادر افراد کی یاد منائی جا رہی ہےجو اپنے دور کے بدترین ظالموں سے جا ٹکرائے امریکہ و اسرائیل فلسطین میں اپنا اعلان کردہ ایک ہدف بھی حاصل نہیں کر سکے جبکہ حماس آج بھی اپنے مزاحمت کے ہدف پر قائم ہے۔

 شیعہ علماء کونسل کے علامہ عارف واحدی نے کہا کہ قاسم سلیمانی، حسن نصراللہ، یحیی سنوار نے جانیں دے کر اپنی اقوام میں نئی روح پھونکی، پتھروں سے لڑنے والے فلسطینی آج راکٹوں سے جنگ لڑ رہے ہیں،علامہ افتخار نقوی نے کہا کہ شہداء کو علم تھا کہ اس راستے میں موت ہے تاہم وہ نہیں گھبرائے آج دشمن کی نیندیں حرام ہیں۔

اس موقع پر شہداء کے بلندی درجات کے لئے دعا بھی کی گئی۔ 

 یہ بھی پڑھیں ؛ ’ایران کی جانب بڑھنے والا ہاتھ کاٹ دیا جائے گا‘: ایران کا ٹرمپ کے بیان پر ردعمل