سال نو کا آغاز : مفت لیپ ٹاپ حاصل کرنے کے خواہشمند طلبا کے لئے بڑی خوشخبری

(24نیوز)نئے سال کے آغاز پر ہی مفت لیپ ٹاپ حاصل کرنے کے خواہشمند طلبا کے لئے بڑی خوشخبری آگئی۔

تفصیلات کے مطابق پنجاب کے وزیر تعلیم رانا سکندر حیات نے اعلان کیا ہے کہ حکومت نے 2025 کو تعلیم کے شعبے میں اصلاحات کا سال قرار دیا ہے اور اس سلسلے میں نجی تعلیمی اداروں کے طلبہ کو بھی 10,000 لیپ ٹاپ تقسیم کرنے کا فیصلہ کیا ہے۔

وزیر تعلیم کا کہنا تھا کہ گزشتہ سال کی طرح 2025 میں بھی حکومت نے تعلیم کے نظام کو مضبوط کرنے پر توجہ دی۔ حکومت نے 2 لاکھ جعلی داخلے ختم کیے اور 26,000 اساتذہ کی بحالی کے ذریعے استاد کی کمی کو دور کیا۔

یہ بھی پڑھیں:دسواں امیدوار بھی دستبردار؛پی پی 289 سے   ن لیگ کے اسامہ عبدالکریم بلامقابلہ رکن اسمبلی منتخب

رانا سکندر حیات نے بتایا کہ حکومت نے تاریخی نصاب اصلاحات، امتحانی اصلاحات متعارف کروائیں اور امتحانی بورڈز کو ای-مارکنگ سسٹم پر منتقل کیا۔

انہوں نے مزید کہا کہ پنجاب حکومت نے ابتدائی بچپن کی تعلیم (ECE) کو ترجیح دی، جس کے تحت 10,000 اسکولوں میں ECE رومز قائم کیے گئے اور 1.1 ملین طلبہ کو روزانہ غذائیت فراہم کی گئی۔

صوبائی وزیر کا کہنا تھا کہ کہ حکومت نے 268 اسکولوں کو اپ گریڈ کیا، 37 اساتذہ سے متعلقہ ہراسانی کے کیسز حل کیے، اور لیپ ٹاپ سکیم کو نجی شعبے کے طلبہ تک بھی پھیلایا۔

مزید برآں، 450 کالجز میں پرنسپلز کی تعیناتی میرٹ کے مطابق کی گئی جبکہ 29 یونیورسٹیوں کے وائس چانسلرز کی تعیناتی کا عمل مکمل کر لیا گیا۔

رانا سکندر حیات نے زور دیا کہ یہ اقدامات پنجاب کے تعلیمی نظام میں رسائی، معیار اور گورننس کو بہتر بنانے کے لیے کیے جا رہے ہیں۔

یہ بھی پڑھیں:شناختی کارڈ بنوانے والوں کے لیے نئی سہولت! چارجز کیا ہوں گے؟