مناظرے کیلئے تیارہوں،بلاول کا شہباز شریف کو سندھ اور پنجاب کے موازنے کیساتھ جواب

(روزینہ علی )چیئرمین پاکستان پیپلزپارٹی بلاول بھٹو زرداری نے صدر ن لیگ کو ان کے مناظرے سے متعلق ٹویٹ کا جواب دیدیا۔
سماجی رابطے کی ویب سائٹ ایکس پر بلاول بھٹو نے شہبازشریف کو جواب دیتے ہوئے کہاکہ میں مناظرے اور معائنے کیلئے تیار ہوں، میاں نواز شریف مجھ سے خیرپور گمبٹ میں مناظرہ کرلیں،جہاں کا ہسپتال پنجاب کے کسی بھی ہسپتال سے بہتر ہے، گمبٹ ہسپتال میں علاج بالکل مفت ہے اور میاں صاحب نے تین بار وزیراعظم بننے کے باوجود بھی گمبٹ کا دورہ نہیں کیا۔
چیئرمین پی پی نے کہاکہ نواز شریف تھرپارکر آکر مناظرہ کرلیں، وہاں کے انفرااسٹرکچر کا معائنہ بھی ہوجائے گا اور چولستان سے تھر کا موازنہ بھی ہوجائے گا،تھر میں کوئلے کے منصوبے جس کی نواز شریف اور شہباز شریف مخالفت کرتے تھے، کراچی نہیں بلکہ فیصل آباد کو سستی بجلی فراہم کررہا ہے۔

میں مناظرے اور معائنے کے لئے تیار ہوں، میاں نواز شریف مجھ سے خیرپور گمبٹ میں مناظرہ کرلیں جہاں کا اسپتال پنجاب کے کسی بھی اسپتال سے بہتر ہے اور یہاں علاج بالکل مفت ہے اور میاں صاحب نے تین بار وزیراعظم بننے کے باوجود بھی گمبٹ کا دورہ نہیں کیا یا وہ تھرپارکر آجائیں، وہاں کے… https://t.co/WThzbP0P6j

— BilawalBhuttoZardari (@BBhuttoZardari) January 27, 2024

بلاول بھٹو زرداری نے کہاکہ میاں صاحب کراچی کے این آئی سی وی ڈی کے باہر مباحثہ کرلیں جہاں گزشتہ برس پنجاب کے 84,390 افراد کا علاج ہوا،این آئی سی وی ڈی میں اہلیان پنجاب کا علاج اس بات کا ثبوت ہے کہ پنجاب کے ہسپتالوں میں علاج کی سندھ جیسی سہولیات موجود نہیں ہیں۔
چیئرمین پیپلزپارٹی نے کہاکہ میاں صاحب راہ فرار اختیار نہ کریں، براہ کرم بتائیں کہ کس شہر میں اور کس تاریخ کو مباحثہ کرنا ہے۔

یہ بھی پڑھیں:ہفتے میں 3چھٹیاں،پارلیمنٹ میں تجویز پیش