چیٹ جی پی ٹی میں دلچسپ فیچر کے اضافے کا اعلان

(ویب ڈیسک) اوپن اے آئی نے دلچسپ فیچر متعارف کروانے کا اعلان کیا ہے جس میں چیٹ جی پی ٹی اب 'دیکھنے، سننے اور باتیں' کرنے کے قابل ہوگا۔

کمپنی کی جانب سے آرٹی فیشل انٹیلی جنس (اے آئی) ٹیکنالوجی سے لیس چیٹ بوٹ میں بڑی اپ ڈیٹس کی گئی ہیں، جس کے بعد صارفین موبائل پر چیٹ جی پی ٹی سے گفتگو کر سکتے ہیں اور اس مقصد کے لیے 5 آوازوں میں سے کسی ایک کا انتخاب کر سکتے ہیں۔ اسی طرح صارفین چیٹ جی پی ٹی سے تصاویر شیئر کرکے اس کے مخصوص حصوں کا تجزیہ کرا سکتے ہیں۔

کمپنی کے مطابق یہ نئے فیچر ماہانہ فیس ادا کرنے والے صارفین کو آئندہ 2 ہفتوں تک دستیاب ہوں گے۔ وائس چیٹ کا آپشن آئی او ایس اور اینڈرائیڈ ڈیوائسز پر چیٹ جی پی ٹی کی ایپ تک محدود ہوگا جبکہ امیج پراسیسنگ کا فیچر تمام پلیٹ فارمز پر دستیاب ہوگا۔

مزید پڑھیں: ’سام سنگ‘ نے اے سیریز کے دو نئے ماڈلز فون متعارف کرا دیے

خیال رہے کہ اوپن اے آئی نے نومبر 2022 میں چیٹ جی پی ٹی کو متعارف کرایا تھا جس کے بعد سے دنیا بھر میں کروڑوں افراد اسے استعمال کر رہے ہیں۔ چیٹ جی پی ٹی کی مقبولیت نے دیگر بڑی ٹیکنالوجی کمپنیوں جیسے گوگل اور میٹا کو اپنے اے آئی چیٹ بوٹس متعارف کرانے پر مجبور کر دیا۔

مائیکرو سافٹ نے تو چیٹ جی پی ٹی پر مبنی اے آئی سسٹمز کو لگ بھگ اپنی تمام سروسز کا حصہ بنا دیا ہے۔ یہ گوگل لینس کی طرح کا فیچر ہوگا جس کے ذریعے تصاویر کے بارے میں تفصیلات حاصل کی جا سکتی ہیں۔