ڈاکٹر محمد باقر قالیباف دوبارہ ایرانی پارلیمنٹ کے سپیکر منتخب

( 24 نیوز)محمد باقر قالیباف ایک بار پھر ایران کی پارلیمنٹ کے سپیکر منتخب ہوگئے ہیں، ایرانی خبر ایجنسی فارس کے مطابق محمد باقر قالیباف مسلسل ساتویں سال اس اہم عہدے کیلئے دوبارہ منتخب ہوئے ہیں۔

رپورٹ کے مطابق قالیباف نے پارلیمانی ووٹنگ میں اکثریت حاصل کی جس کے بعد انہیں دوبارہ سپیکر منتخب کرنے کا باضابطہ اعلان کیا گیا۔

محمد باقر قالیباف کو ایران کی سیاست میں ایک بااثر شخصیت تصور کیا جاتا ہے اور وہ حالیہ ایران امریکا مذاکرات میں بھی نمایاں کردار ادا کر رہے ہیں۔

 یہ بھی پڑھیں:اپوزیشن کے مرکزی دفتر پر پولیس کا دھاوا ، دروازے توڑ کر عمارت پر قبضہ کر لیا

رپورٹس کے مطابق وہ جنگ کے خاتمے اور خطے میں کشیدگی کم کرنے کیلئے جاری سفارتی کوششوں میں اہم مذاکرات کاروں میں شامل رہے ہیں۔

سیاسی مبصرین کے مطابق قالیباف کی دوبارہ کامیابی اس بات کا اشارہ سمجھی جا رہی ہے کہ ایرانی قیادت موجودہ سیاسی اور سفارتی پالیسیوں میں تسلسل برقرار رکھنا چاہتی ہے، خصوصاً ایسے وقت میں جب خطے میں کشیدگی، جنگ بندی مذاکرات اور عالمی سفارت کاری اہم مرحلے میں داخل ہوچکی ہے۔

محمد باقر قالیباف اس سے قبل تہران کے میئر بھی رہ چکے ہیں اور ایرانی سیاست و سکیورٹی معاملات میں طویل تجربہ رکھتے ہیں۔