محسن نقوی کا فیڈرل کانسٹیبلری ہیڈکوارٹر کا دورہ، 3 شہدا کی نماز جنازہ میں شرکت

(24 نیوز)وفاقی وزیر داخلہ محسن نقوی کا  پشاور میں فیڈرل  کانسٹیبلری  کے ہیڈ  کوارٹر کا دورہ ، فیڈرل  کانسٹیبلری  کے  3 بہادر  سپوتوں کی نماز جنازہ میں شرکت ، وزیر  اعلی  خیبرپختونخوا  علی  امین  گنڈاپور سمیت اہم شخصیات بھی شریک ہوئیں ۔

وفاقی وزیرداخلہ محسن  نقوی  نے  جام  شہادت  نوش  کرنے  والے نائیک  صادق حسین، سپاہی  عبدالغفار اور سپاہی  زیور  خان کی  قربانی  کو  خراج  عقیدت  پیش  کیا ۔

وزیرداخلہ  محسن  نقوی ، وزیر  اعلیٰ  خیبرپختونخوا  علی  امین  گنڈاپور، آئی جی  خیبرپختونخوا پولیس ذوالفقار  حمید، کمانڈنٹ  فیڈرل  کانسٹیبلری  نذیر  گاڑا،چیف  سیکرٹری  خیبرپختونخوا  نے شہداء  کے  جسد خاکی  پر پھول  رکھے  اور  فاتحہ  خوانی  کی۔ 

وزیر  داخلہ  محسن  نقوی  نے  شہداء  کے  لواحقین  سے  ملاقات کی اور انھوں نے دلی  ہمدردی  اور  تعزیت  کا  اظہار  کیا ، وزیر  داخلہ  محسن  نقوی  نے  شہداء  کے  لواحقین  کو  دلاسہ  دیا ، وزیرداخلہ  محسن  نقوی  نے  شہداء  کے  درجات  کی  بلندی  کے  لئے  دعا  کی، وزیرداخلہ  محسن  نقوی  اور  وزیر  اعلیٰ  خیبرپختونخوا  علی  امین  گنڈاپور  نے  شہداء  کے  جسد  خاکی  کو  کندھا  دیا۔

اس موقع پر گفتگو کرتے ہوئے محسن نقوی نے کہا کہ جام شہادت  نوش  کرنے  والے  جوانوں  کی  قربانی رائیگاں  نہیں  جائے  گی۔انھوں نے کہا کہ  شہداء  کے خاندان  ہمارے  اپنے  خاندان  ہیں  اور  قوم  ہمیشہ  ان خاندانوں  کی  مقروض  رہے  گی، وفاقی  وزیرداخلہ  محسن  نقوی  نے فیڈرل  کانسٹیبلری  ہسپتال  میں  زیر  علاج  زخمی  نائب صوبیدار  کاشف  کی عیادت  کی۔ 

وزیرداخلہ  محسن  نقوی  نے زخمی نائب صوبیدار  کاشف  کی  خیریت  دریافت  کی، زخمی  نائب صوبیدار  کاشف  کے  بلند  عزم  اور  جذبے  کو  سراہا اور کہا کہ آپ نے جوانمردی  کی  لازوال  مثال  قائم  کی اور  دشمن  کے حملے  کو پسپا  کیا۔

انھوں ںے کہا کہ جس دلیری  سے  آپ نے بھارتی  سپانسرڈ  دہشتگردوں  کا  مقابلہ  کیا  وہ قابل  تحسین  ہے،ہم سب آپ کے  ساتھ  ہیں  اور  ہمیشہ  ساتھ  رہیں  گے۔

اس موقع پر آئی جی  خیبرپختونخوا  ذوالفقار  حمید، کمانڈنٹ  فیڈرل  کانسٹیبلری  نذیر  گاڑا، سول انتظامیہ  اور  اعلیٰ  حکام  بھی موجود  تھے۔

یہ بھی پڑھیں :حماد اظہر نے این اے 129 سے الیکشن نہ لڑنے کا باقاعدہ اعلان کر دیا