مریم نواز کے بعد نوازشریف کا نام بھی ای سی ایل سے خارج

(مانیٹرنگ ڈیسک)سابق وزیراعظم اور مسلم لیگ ن کے قائد نواز شریف کا نام ایگزٹ کنٹرول لسٹ سے خارج کردیا گیا۔
نجی ٹی وی کے مطابق سابق وزیراعظم نوازشریف کا نام ای سی ایل سے ہٹا دیاگیاجبکہ حکومتی اتحادی ایم این اے محسن داوڑ کا نام ای سی ایل سے نہیں نکالا گیا۔
واضح رہے کہ وزارت داخلہ نے گزشتہ روز سے ترمیم شدہ ای سی ایل رولز پر عملدرآمد شروع کر دیاہے۔ اہم سیاسی،کاروباری شخصیات کیساتھ بیوروکریٹس کے نام بھی ای سی ایل سے نکال دیئے گئے۔ذرائع کے مطابق وزیراعظم شہباز شریف کا نام ای سی ایل سے نکال دیا گیا،ن لیگ کی سینئرنائب صدر مریم نواز کا نام بھی ای سی ایل سے ہٹا دیا گیا،اس کے علاوہ شہباز شریف کے اہل خانہ کا نام بھی ای سی ایل سے خارج کیا گیا،جبکہ سابق وزیر اعظم شاہد خاقان عباسی اور ان کے صاحبزادے عبداللہ خاقان کے علاوہ سعد رفیق، خواجہ آصف ، رانا ثنا اللہ کا نام بھی لسٹ سے خارج کردیا گیا۔ وزیر خزانہ مفتاح اسماعیل کا نام بھی مستقل طور پر ایگزٹ کنٹرول لسٹ سے نکال دیا گیا۔سابق صدر آصف زرداری اور ان کی ہمشیرہ فریال تالپور کا نام بھی ای سی ایل سے نکال دیاگیا۔ سابق چیئرپرسن اوگرا عظمیٰ عادل سمیت دیگر اہم شخصیات کے نام بھی ای سی ایل سے نکال دیئے گئے۔ 
وزارت داخلہ نے چار کیٹیگریز میں مختلف شخصیات کے نام ای سی ایل میں برقرار رکھے ہیں، دہشتگردی، منشیات، سپریم کورٹ اور ہائی کورٹس کی جانب سے سفارش کردہ نام بھی نہیں نکالے جا رہے۔ہاو¿سنگ سوسائٹیز اور فراڈ کے ملزمان کے نام بھی لسٹ سے نہیں نکالے جائیں گے ،نیب اور ایف آئی اے کے سفارش کردہ ناموں کو ای سی ایل سے نکالا جا رہا ہے، تمام 4 ہزار 863 ناموں کا جائزہ لے رہے ہیں اور جلد مزید نام بھی ای سی ایل سے نکال دیں گے، ایف آئی اے اور امیگریشن ڈیپارٹمنٹس کو ای سی ایل سے نکالے جانے والے ناموں بارے آگاہ کر دیا گیا۔

یہ بھی پڑھیں:  اقتدار بچانے کیلئے عمران خان کیا کچھ کرتے رہے۔زرداری کو بڑی پیشکش کی