خواتین کے پیشاب کے مسائل کی تشخیص کا جدید اور آسان طریقہ متعارف

(24 نیوز ) پاکستانی یورولوجسٹ ڈاکٹر شبیر چوہدری نے خواتین کے پیشاب کے مسائل کی تشخیص کا ایک جدید اور آسان طریقہ متعارف کرایا ہے، جس کے ذریعے بغیر کسی بڑے آپریشن یا ہسپتال میں داخلے کے تیز رفتار تشخیص ممکن ہو گئی ہے۔

ڈاکٹر شبیر چوہدری، جو کہ گردوں کی پیوند کاری کے سرجن اور یورولوجسٹ ہیں، نے بتایا کہ بہت سی خواتین عام پیشاب کے مسائل کا شکار ہوتی ہیں، جیسے بار بار پیشاب آنا، اچانک پیشاب کی شدید حاجت، کھانسی یا چھینک کے دوران پیشاب کا رس جانا، اور رات کے وقت بار بار بیت الخلا جانا۔

ان کے مطابق یہ علامات اکثر مثانے کی حساسیت یا پیشاب کی نالی میں رکاوٹ سے جڑی ہوتی ہیں، جو روزمرہ زندگی کو متاثر کرتی ہیں اور نیند خراب کر دیتی ہیں۔

ایسے مسائل کی تشخیص کے لیے ڈاکٹر شبیر نے جدید سسٹوسکوپی (cystoscopy) طریقہ استعمال کرنے کا مشورہ دیا ہے، اس طریقہ کار میں ایک باریک اور لچکدار نالی (ٹیوب) استعمال کی جاتی ہے جس میں اعلیٰ معیار کا کیمرہ لگا ہوتا ہے، جو مثانے اور پیشاب کی نالی کا اندرونی معائنہ کرتا ہے۔

ڈاکٹر شبیر کے مطابق پہلے یہ معائنہ عام طور پر ہسپتال میں داخلے، آپریشن تھیٹر کی تیاری اور جنرل اینستھیزیا کے ساتھ کیا جاتا تھا۔ تاہم جدید ٹیکنالوجی کی بدولت اب یہی عمل زیادہ آسان اور تیز طریقے سے کیا جا سکتا ہے۔

نئے طریقہ کار کی مدد سے ڈاکٹر جلدی مسئلہ تشخیص کر سکتے ہیں اور مریضوں کو بغیر کسی غیر ضروری تاخیر کے صحیح علاج فراہم کیا جا سکتا ہے۔

یہ بھی پڑھیں :پاک بحریہ کا  فضا سے سطح سمندر پر مار کرنے والے کروز میزائل ’تیمور‘ کا کامیاب تجربہ