مودی جی !راہول گاندھی نے بھارتی وزیر اعظم سے ٹرمپ کے 5 طیارے مار گرانے کے بیان پر وضاحت طلب کرلی

( ویب ڈیسک )بھارت کی اپوزیشن جماعت کانگریس پارٹی نے وزیر اعظم نریندر مودی سے مطالبہ کیا ہے کہ وہ اس بارے میں واضح وضاحت پیش کریں کہ حالیہ بھارت-پاکستان فوجی تصادم کے دوران امریکی صدر ڈونلڈ ٹرمپ کے دعوے کے مطابق 5 لڑاکا طیارے مار گرائے گئے تھے۔

 کانگریس کے رہنما راہول گاندھی نے ہفتہ کے روز اس معاملے پر مودی سے مطالبہ کیا کہ وہ قوم کو ان طیاروں کی بابت سچائی سے آگاہ کریں۔

راہول گاندھی نے سوشل میڈیا پلیٹ فارم ’ایکس‘ پر پوسٹ کیا کہ ’مودی جی، 5 طیاروں کی حقیقت کیا ہے؟ ملک کو جاننے کا حق ہے!۔

 یہ تنازع اس وقت شروع ہوا جب صدر ٹرمپ نے جمعہ کی شب ریپبلکن قانون سازوں کے ساتھ وائٹ ہاؤس ڈنر میں گفتگو کے دوران بھارت-پاکستان کے درمیان جھڑپ کا حوالہ دیتے ہوئے کہا کہ ’درحقیقت، طیارے فضا سے مار گرائے جا رہے تھے، 5، 4 یا 5 ، لیکن میرا خیال ہے کہ 5 طیارے واقعی مار گرائے گئے تھے۔

 یہ بھی پڑھیں:5.4 شدت کا زلزلہ، عوام میں خوف و ہراس پھیل گیا

 ٹرمپ نے یہ واضح نہیں کیا کہ یہ طیارے کس ملک کے تھے، اور نہ ہی مزید تفصیلات فراہم کیں۔

بھارت-پاکستان جنگ کے بعد، ٹرمپ متعدد بار (60 سے زائد مرتبہ) یہ دعویٰ کر چکے ہیں کہ 10 مئی کو سوشل میڈیا کے ذریعے اعلان کردہ جنگ بندی ان کی ثالثی کا نتیجہ تھی، جس سے پہلے امریکا نے دونوں ممالک سے خفیہ سفارتی روابط قائم کیے تھے۔

 تاہم بھارت نے ان کے اس دعوے کو چیلنج کیا، اور کہا ہے کہ جنگ بندی امریکی مداخلت یا تجارتی تعلقات منقطع کرنے کی دھمکی کے باعث نہیں ہوئی۔

کانگریس کے جنرل سیکریٹری برائے اطلاعات جے رام رمیش نے مودی پر ٹرمپ کے دعوؤں کا جواب دینے میں ناکامی کا الزام لگایا۔

انہوں نے کہا کہ ٹرمپ میزائل 24ویں بار داغا گیا ہے، وہی دو پیغامات، وزیر اعظم کو اب خود پارلیمنٹ میں آ کر واضح اور دو ٹوک بیان دینا ہوگا کہ صدر ٹرمپ پچھلے 70 دنوں سے کیا دعویٰ کر رہے ہیں۔

جیسے جیسے بھارتی پارلیمنٹ کا مون سون اجلاس قریب آ رہا ہے، اپوزیشن نے اشارہ دیا ہے کہ وہ مودی سے جواب مانگنے کا سلسلہ جاری رکھے گی۔