ایران جنگ میں ہلاک امریکی فوجیوں کی تعداد میں مزید اضافہ

( ویب ڈیسک )ایران کے ساتھ جاری جنگ کے دوران امریکی فوجیوں کی ہلاکتوں کی تعداد پینٹاگون کی جانب سے عوامی طور پر بتائے گئے اعداد و شمار سے زیادہ ہونے کا انکشاف ہوا ہے۔

امریکی اخبار واشنگٹن پوسٹ نے پانچ نامعلوم امریکی حکام کے حوالے سے رپورٹ کیا ہے کہ ایران جنگ کے دوران کم از کم 22 امریکی فوجی ہلاک ہو چکے ہیں، جبکہ پینٹاگون کے عوامی ڈیٹا بیس میں اس وقت 18 فوجیوں کی ہلاکتیں درج ہیں۔ اس طرح اخبار کے مطابق کم از کم 4 ہلاکتیں سرکاری طور پر جاری کردہ اعداد و شمار میں شامل نہیں ہیں۔

رپورٹ کے مطابق ایک اور امریکی عہدیدار نے بتایا کہ جن اضافی ہلاکتوں کا ذکر کیا گیا ہے، ان میں سے تمام براہِ راست ایران کے ساتھ جاری جنگ سے منسلک نہیں تھیں۔

 یہ بھی پڑھیں:ٹرمپ نے معاہدے کا اعلان کردیا !
ان میں وہ امریکی فوجی اہلکار بھی شامل ہیں جو مشرق وسطیٰ میں موجود تھے اور خطے میں جاری کشیدگی اور لڑائی کے دوران ہلاک ہوئے۔

واشنگٹن پوسٹ کے مطابق اخبار نے پینٹاگون سے ہلاکتوں کے اعداد و شمار میں فرق کے بارے میں سوالات کیے، تاہم امریکی محکمہ دفاع نے ان سوالات کا جواب دینے سے گریز کیا۔

دوسری جانب امریکی وزیر دفاع پیٹ ہیگسیتھ نے واشنگٹن پوسٹ کی رپورٹ کو مسترد کر دیا۔ انہوں نے سوشل میڈیا پلیٹ فارم ایکس پر اپنے بیان میں رپورٹ کو ’’مکمل جھوٹ‘‘ قرار دیا۔

 اس معاملے پر پینٹاگون کی جانب سے ہلاکتوں کے نئے اعداد و شمار یا واشنگٹن پوسٹ کی رپورٹ میں بتائی گئی 22 ہلاکتوں کی آزادانہ طور پر تصدیق سامنے نہیں آئی۔

 مزید پڑھیں:چارجنگ کے دوران پاور بینک پھٹ گیا، طیارے کی ہنگامی لینڈنگ

یہ معاملہ ایسے وقت میں سامنے آیا ہے جب ایران جنگ کے دوران امریکی فوجیوں کی ہلاکتوں اور زخمی ہونے والوں کے اعداد و شمار پہلے بھی تبدیل ہوتے رہے ہیں۔

جولائی میں پینٹاگون کے ڈیٹا بیس سے ایران جنگ میں ہلاک ہونے والے چار امریکی فوجیوں کو الگ زمرے میں منتقل کیے جانے پر بھی سوالات اٹھے تھے۔ بعد میں ان ہلاکتوں کو اوورسیز آپریشنز کے زمرے میں شامل کیا گیا تھا۔

واشنگٹن پوسٹ کے مطابق اگست میں پینٹاگون کے اعداد و شمار میں ایران جنگ کے دوران 18 امریکی فوجیوں کی ہلاکت اور 756 کے زخمی ہونے کی تفصیلات درج تھیں۔