رمضان المبارک کے آغاز پرعوام کو  جھٹکا ، برائلر گوشت کی قیمت میں ہوشرباء اضافہ

(خان شہزاد)رمضان المبارک کے آغاز پر شہریوں کو مہنگائی کا ایک اور جھٹکا لگ گیا ہے، پولٹری فارمز نے صرف دو دنوں میں برائلر گوشت کی قیمت میں 36 روپے فی کلو اضافہ کر دیا۔

مارکیٹ ذرائع کے مطابق اوپن مارکیٹ میں مرغی کا گوشت 497 روپے فی کلو تک فروخت ہو رہا ہے، جس کے باعث خریداروں کو شدید مشکلات کا سامنا ہے، دوسری جانب رمضان بازاروں میں چکن گوشت 14 روپے فی کلو کم نرخ پر دستیاب ہے تاکہ شہریوں کو کچھ ریلیف فراہم کیا جا سکے۔

سرکاری طور پر زندہ برائلر کا فارم ریٹ 315 روپے فی کلو مقرر کیا گیا ہے، جبکہ تھوک قیمت 329 روپے اور پرچون ریٹ 344 روپے فی کلو طے کیا گیا ہے تاہم مختلف علاقوں میں ان نرخوں سے زائد قیمت وصول کیے جانے کی شکایات بھی سامنے آ رہی ہیں۔

یہ بھی پڑھیں:ترلائی امام بارگاہ حملہ: 36 شہدا کے اہلخانہ کو امدادی رقوم کے چیکس تقسیم

ادھر انڈوں کی قیمت میں استحکام دیکھا گیا ہے اور فارمی انڈے 236 روپے فی درجن کی سطح پر برقرار ہیں۔

شہریوں کا کہنا ہے کہ رمضان المبارک میں اشیائے خورونوش کی قیمتوں میں اضافے نے گھریلو بجٹ متاثر کر دیا ہے، جبکہ انتظامیہ سے مطالبہ کیا جا رہا ہے کہ سرکاری نرخوں پر عملدرآمد یقینی بنایا جائے۔