امن معاہدہ، ڈالر 10 روز کی کم ترین سطح پر

(24 نیوز)امریکہ اور ایران کے درمیان جنگ کے خاتمے کے لیے ابتدائی امن معاہدے کی خبر کے بعد امریکی ڈالر اپنی بڑی حریف کرنسیوں کے مقابلے میں 10 روز کی کم ترین سطح پر آ گیا، جبکہ سرمایہ کاروں نے نسبتاً زیادہ خطرے والے اثاثوں کا رخ کرنا شروع کر دیا۔

امریکی اور ایرانی حکام نے اعلان کیا تھا کہ دونوں ممالک جنگ کے خاتمے، ایران پر امریکی ناکہ بندی کے خاتمے اور آبنائے ہرمز کو دوبارہ کھولنے کے لیے ایک فریم ورک پر متفق ہو گئے ہیں۔

 اس پیشرفت کے بعد عالمی منڈی میں خام تیل کی قیمتوں میں بھی نمایاں کمی دیکھی گئی اور برینٹ کروڈ 4 فیصد سے زائد گر کر 83.82 ڈالر فی بیرل تک آ گیا۔

مزید پڑھیں:مذاکرات: ایران کو 12 ارب ڈالر ملیں گے ؟ ایرانی میڈیا کا دعویٰ

کرنسی مارکیٹ میں یورو 0.35 فیصد اضافے کے ساتھ 1.1607 ڈالر جبکہ برطانوی پاؤنڈ 0.3 فیصد بڑھ کر 1.3448 ڈالر تک پہنچ گیا۔

 آسٹریلوی ڈالر میں 0.5 فیصد اور نیوزی لینڈ ڈالر میں 0.4 فیصد اضافہ ریکارڈ کیا گیا۔

ڈالر انڈیکس، جو امریکی کرنسی کی قدر کو دیگر بڑی عالمی کرنسیوں کے مقابلے میں ناپتا ہے، 0.31 فیصد کمی کے بعد 99.492 پوائنٹس پر آ گیا، جو 5 جون کے بعد کم ترین سطح ہے۔