بیوی کو قتل کرکے لاش ڈرم میں پھینکنے والا شوہر گرفتار

(ویب ڈیسک) کراچی کے علاقے کورنگی اللہ والا ٹاؤن میں خاتون کو قتل کر کے لاش ڈرم میں پھینکنے والے سفاک شوہر کو گرفتار کرلیا گیا۔

تفصیلات کے مطابق کورنگی صنعتی ایریا میں واقع مہران ٹاؤن میں ایک شخص نیلے رنگ کا ڈرم پھینک کر جارہا تھا جسے علاقہ مکینوں نے مشکوک جان کر روکا اور ڈرم کھول کر دیکھا تو اُس میں خاتون کی لاش تھی۔

علاقہ مکینوں نے پولیس کو واقعے سے متعلق اطلاع دی جس پر پولیس نے جائے وقوعہ پہنچ کر سفاک شوہر کو گرفتار کرلیا۔ایس ایچ او اورنگزیب خٹک نے بتایا کہ کورنگی اللہ والا ٹاؤن سیکٹر 31 اے رشیدیہ مسجد کے قریب پولیس نے ایک ملزم بابو کو گرفتار کر کے پلاسٹک ڈرم سے خاتون کی لاش برآمد کرلی ہے۔

مزید پڑھیں: گلوکارہ گلاب کا نیا گانا ’عشق دے اوکھے راہ‘ ریلیز

گرفتار ملزم نے پولیس کو بتایا کہ وہ کالا پل چینسر گوٹھ کا رہائشی ہے اور اس نے جمعرات کو اپنی بیوی کو منہ پر تکیہ رکھ کر قتل کیا جس کے بعد لاش ڈرم میں ڈال کر سوزوکی پک اپ میں رکھ کر کورنگی کے علاقے میں پھینکنے آیا تھا۔

پولیس کے مطابق مقتولہ کی لاش 3 دن پرانی ہے جبکہ مقتولہ 4 بچوں کی ماں تھی تاہم پولیس نے لاش ضابطے کی کارروائی کے لیے رات گئے جناح ہسپتال منتقل کر دی اور ملزم کو مزید تفتیش کے لیے تھانے منتقل کردیا ہے۔