والد نواز شریف سے ملنے کے لئے بے چین ہوں، احساسات بیان نہیں کرسکتی: مریم نواز

(ویب ڈیسک) پاکستان مسلم لیگ ن کی نائب صدر مریم نواز نے لندن روانگی سے قبل 24 نیوز سے خصوصی گفتگو کرتے ہوئے کہا کہ اپنے والد نواز شریف سے ملنے کے لئے بے چین ہوں، دل کر رہا ہے کب جہاز لینڈ کرے، کب میں اپنے والد سے ملوں، احساسات بیان نہیں کرسکتی۔

بعدازں مسلم لیگ ن کی نائب صدر مریم نواز لاہور ایئر پورٹ سے لندن چلی گئیں۔ مریم نواز قطر ایئر ویز کی پرواز کیو آر 629 کے ذریعے براستہ دوحا سے لندن گئیں۔ مریم نواز کو کل ہی لاہور ہائیکورٹ سے پاسپورٹ واپس ملا تھا، انہوں نے پاسپورٹ ملنے کے بعد ہنگامی پریس کانفرنس بھی کی تھی۔

خاندانی ذرائع کا کہنا ہے کہ مریم نواز کی واپسی ایک ماہ کے بعد 6 نومبر کو شیڈول کی گئی ہے، وہ 3 سال کے بعد اپنے والد نواز شریف سے بالمشافہ ملاقات کر سکیں گی۔ مریم نواز اپنے بھائیوں سے تقریباً 5 سال کے بعد ملیں گی، وہ لندن میں اپنے والد سے تفصیلی سیاسی مشاورت بھی کرینگی۔

مریم نواز لندن میں اپنے والد نواز شریف کی عیادت کریں گی اور ان کے علاج معالجے کی نگرانی بھی کریں گی، خاندانی ذرائع کے مطابق مریم نواز ممکنہ طور پر نواز شریف کے ہمراہ وطن واپس آئیں گی۔