عام انتخابات میں پیپلز پارٹی سب سے زیادہ نشستیں جیتے گی: سعید غنی

(24نیوز) سابق صوبائی وزیر اور رہنما پاکستان پیپلزپارٹی سعید غنی نے کہا ہے کہ عام انتخابات میں مسلم لیگ ن کا سندھ سے صفایا ہو جائے گا جبکہ پیپلز پارٹی سب سے زیادہ نشستیں جیتے گی۔

 میڈیا سے گفتگو کرتے ہوئے سعید غنی کا کہنا تھا کہ جو لوگ پیپلز پارٹی میں شامل ہو رہے ہیں وہ ہمارے پرانے ساتھی ہیں، لیاری سے شاہ جہاں بلوچ مسلم لیگ ن سے پیپلز پارٹی میں شامل ہو رہے ہیں، وہ 2013 سے 2018 تک پیپلزپارٹی کے رکن قومی اسمبلی تھے۔ شاہ جہاں بلوچ ناراض ہو کر مسلم لیگ ن میں شامل ہوگئے تھے اور وہ صدر مسلم لیگ ن ضلع جنوبی تھے۔

سعید غنی کا کہنا تھا  کہ اکبر یوسفزئی اور عابد سومرو نے بھی پیپلزپارٹی میں شمولیت کا فیصلہ کیا، ان کا بھی مشکور ہوں، پرانے دوستوں کی شمولیت سے پیپلز پارٹی مزید مضبوط ہوگی۔  اُنہوں بتایا کہ ملک میں انتخابات کی گہما گہمی ہے، مخالف سیاسی جماعتوں کو یقین ہے کہ پیپلز پارٹی کو تنہا نہیں ہرا سکتے، وہ ہمیں ہرانے کے لیے مل رہے ہیں اور یہی ہماری جیت ہے۔

مزید پڑھیں:   مسلم لیگ ن کا منشور عوام کے سامنے پیش کرنے کی تقریب

سعید غنی کا مزید کہنا تھا  کہ ایم کیو ایم سے ہمیں کسی خیر کی توقع نہیں، پیپلز پارٹی انتخابات میں سب سے زیادہ نشستیں جیتے گی، کراچی میں پیپلز پارٹی کی کارکردگی پہلے سے بہتر ہے۔ سمجھ سے بالاتر ہے کس بنیاد پر فہمیدہ مرزا کو الیکشن لڑنے کی اجازت دی گئی، وہ 26 کروڑ روپے کی ڈیفالٹر ہیں۔