5 گریمی ایوارڈ جیتنے والے میوزک ایگزیکٹو کلائیو ڈیوس 94 برس کی عمر میں انتقال کر گئے

(24 نیوز )دنیا بھر میں موسیقی کے کئی عظیم فنکاروں کو متعارف کرانے والے معروف میوزک پروڈیوسر اور ریکارڈ ایگزیکٹو کلائیو ڈیوس پیر کے روز 94 برس کی عمر میں انتقال کر گئے۔

کلائیو ڈیوس، جنہیں اپنی غیرمعمولی صلاحیت اور "سنہری سماعت" (Golden Ear) کی بدولت موسیقی کی دنیا میں منفرد مقام حاصل تھا، نے جینس جوپلن، وٹنی ہیوسٹن اور بروس اسپرنگسٹین جیسے عالمی شہرت یافتہ فنکاروں کو متعارف کرایا، جبکہ کارلوس سینٹانا، راڈ اسٹیورٹ اور اریتھا فرینکلن کے کیریئر کو بھی نئی زندگی دی۔

وہ حالیہ عرصے میں سونی میوزک انٹرٹینمنٹ کے چیف کری ایٹو آفیسر کے طور پر خدمات انجام دے رہے تھے، اس سے قبل وہ کولمبیا، اریسٹا ریکارڈز اور جے ریکارڈز جیسے بڑے میوزک لیبلز کی قیادت بھی کر چکے تھے۔ ان کے نمائندے کے مطابق کلائیو ڈیوس نیویارک کے علاقے مین ہیٹن میں واقع اپنی رہائش گاہ پر انتقال کر گئے۔ وہ حال ہی میں سانس کی نالی کے انفیکشن کے باعث اسپتال میں زیر علاج بھی رہے تھے۔

چھ دہائیوں پر محیط اپنے شاندار کیریئر کے دوران انہوں نے بلی جوئل، دی گریٹ فل ڈیڈ، ایلیشیا کیز، سائمن اینڈ گارفنکل، جینیفر ہڈسن، بیری مینیلو، پنک فلوئیڈ، ارتھ ونڈ اینڈ فائر، ایروسمتھ، کینی جی، کرسٹینا ایگیلیرا، کیلی کلارکسن اور پیٹی اسمتھ سمیت بے شمار فنکاروں کی سرپرستی کی۔

کلائیو ڈیوس کو اپنے کیریئر میں پانچ گریمی ایوارڈز سے نوازا گیا، جن میں ریکارڈنگ اکیڈمی ٹرسٹیز ایوارڈ بھی شامل ہے جو انہیں  2000 میں دیا گیا۔ 1976 سے وہ ہر سال گریمی ایوارڈز سے قبل موسیقی کی صنعت کے نمایاں فنکاروں اور منتظمین کو ایک خصوصی تقریب میں جمع کرتے رہے۔

2013 میں ایک انٹرویو کے دوران اپنی صلاحیت کے بارے میں بات کرتے ہوئے کلائیو ڈیوس نے کہا تھا کہ شاید وہ پیدائشی طور پر غیرمعمولی سماعت نہیں رکھتے تھے، لیکن وقت کے ساتھ انہوں نے یہ صلاحیت پیدا کر لی۔ ان کے بقول جب آپ جینس جوپلن یا بروس اسپرنگسٹین جیسے فنکاروں کو دیکھتے ہیں تو فوراً اندازہ ہو جاتا ہے کہ وہ غیرمعمولی صلاحیتوں کے مالک ہیں۔

کلائیو ڈیوس کو موسیقی کی صنعت کی تاریخ کی بااثر ترین شخصیات میں شمار کیا جاتا ہے، جن کی خدمات آنے والی نسلوں تک یاد رکھی جائیں گی۔

یہ بھی پڑھیں :سٹاک مارکیٹ میں تیزی، انڈیکس ایک لاکھ 80 ہزار پوائنٹس کی حد پر بحال