کونسل آف پاکستان نیوزپیپر ایڈیٹرزکے وفد کی ڈی جی آئی ایس پی آر سے ملاقات

(24نیوز) کونسل آف پاکستان نیوزپیپر ایڈیٹرز (سی پی این ای) کے وفد نے ڈی جی آئی ایس پی آر سے ملاقات کی۔CPNE کے ایک اعلیٰ سطحی وفد نے کاظم خان کی قیادت میں ڈی جی آئی ایس پی آر سے ملاقات کی۔

اراکین وفد نے گفتگو کرتے ہوئے کہا کہ معرکہ حق کے دوران شاندار کارکردگی پر افواج پاکستان کو خراج تحسین پیش کرتے ہیں ۔ 

معرکہ حق کے تمام مراحل کے دوران ISPR نے کلیدی کردار ادا کیا اور ہندوستانی میڈیا کے ہیجان انگیز پروپیگنڈے کے جواب میں بروقت اورمعتبر اطلاعات کی فراہمی کو یقینی بنایا۔

 اراکین وفدکا مزید کہناتھا کہ یہ فقید المثال فتح پاکستانی قوم، حکومت پاکستان اور عسکری اداروں کی باہمی اور مربوط حکمت عملی کا ثمر ہے۔ 

ڈی جی آئی ایس پی آر لیفٹیننٹ جنرل احمد شریف چودھری نے کہا کہ نوجوان اس ملک کا سرمایہ ہیں اور انکی ملک بارے مثبت سوچ پاکستان کے روشن مستقبل کی دلیل ہے۔ 

ڈی جی آئی ایس پی آر کاکہنا تھا کہ دہشت گردی کے تمام واقعات کے پیچھے انڈین منفی سوچ اور وسائل کار فرما ہیں۔ پاکستان کی افواج عوام کی تائید سے اس پراکسی جنگ کا قلع قمع کرنے کی پوری صلاحیت رکھتی ہیں۔ 

ترجمان پاک فوج نے کہاکہ بلوچستان میں منفی پروپیگنڈے کے ذریعے عوام میں مایوسی پھیلائی جانے کی مذموم کوششیں کبھی کامیاب نہیں ہونگی کیونکہ بلوچستان کے  محب وطن اورغیور عوام ان ملک دشمن عناصر اور انکے بیرونی آقاؤں کی ریشاداونیوں سے باخوبی آگاہ ہیں۔  

ڈی جی آئی ایس پی آرنے کہاکہ میڈیا نے پاکستان کو درپیش مسائل اور چینلزمیں ہمیشہ ایک ذمہ دارانہ اور مثبت  کردار ادا کیا ہے۔ معرکہ حق کے دوران پاکستانی میڈیا نے نہ صرف ذمہ دارانہ اور اعلیٰ صحافتی اقدار کا مظاہرہ کیا بلکہ انڈین میڈیا کے منفی پروپیگنڈے کا انتہائی مؤثر جواب دیا۔   آخر میں وفد نے ڈی جی آئی ایس پی آر کو یادگاری شیلڈ پیش کی۔