دسمبر میں بلدیاتی انتخابات کرانے کا فیصلہ

(مانیٹرنگ ڈیسک)خیبرپختونخوا حکومت نے بلدیاتی انتخابات کرانے کا فیصلہ کرلیا جو دو مراحل میں کرائے جائیں گے،بلدیاتی انتخابات  15 دسمبر کو ہونگے۔

تفصیلات کے مطابق  صوبائی حکومت کے ترجمان کامران بنگش کا کہنا تھا کہ صوبائی حکومت بلدیاتی انتخابات کرانے کے لیے تیار ہے، اس حوالے سے الیکشن کمیشن کو خط لکھ دیا گیا ہے، دسمبر میں بلدیاتی انتخابات کا انعقاد ممکن بنائیں گے۔

محکمہ بلدیات خیبرپختونخوا کی جانب سے سیکرٹری الیکشن کمیشن کو خط لکھا گیا ہے۔ سیکرٹری الیکشن کمیشن کو لکھے گئے خط میں کہا گیا ہے کہ صوبائی حکومت بلدیاتی اداروں کی مدت مکمل ہونے پر انتخابات وقت پر کرانا چاہتی تھی لیکن کورونا وبا، فاٹا انضمام، حد بندی اور  مغربی سرحدوں پر امن وامان کے مسائل کے باعث بلدیاتی انتخابات کرانے میں تاخیر ہوئی۔

خط کے مطابق الیکشن کمیشن کو انتخابی شیڈول دیا گیا ہے جس کے مطابق بلدیاتی انتخابات 2 مراحل میں کرائے جائیں گے، پہلے مرحلے میں 15 دسمبر کو ویلج اور نیبرہوڈ کونسل کے انتخابات ہوں گے جب کہ دوسرے مرحلے میں اگلے سال 25 مارچ کو چیئرمین تحصیل گورنمنٹ کے انتخابات کرائے جائیں گے۔

خط میں الیکشن کمیشن سے کہا گیا ہے کہ بلدیاتی انتخابات کے انعقاد کے لیے انتظامات یقینی بنائے جائیں اور انتخابات کا انعقاد شفاف، منصفانہ اور قانون کے مطابق یقینی بنایا جائے۔

یہ بھی پڑھیں:    پانچ سے گیارہ سالہ بچوں کے بارے میں اہم فیصلہ ۔۔۔۔