’’میں رویا تھا ، شاید وہ بھی روئی ہوگی‘‘ اداکار شہزاد مختار ادھوری محبت کو یاد کرکے آبدیدہ

(24 نیوز)کراچی سے تعلق رکھنے والے معروف پاکستانی اداکار شہزاد مختار نے حال ہی میں ایک انٹرویو میں اپنی زندگی کی ادھوری محبت سے متعلق دل چھو لینے والا انکشاف کردیا۔

مقبول ڈراموں میں اپنی اداکاری کے جوہر دکھانے والے شہزاد مختار نے بتایا کہ میری ارینج میرج تھی، تاہم میری زندگی میں ایک ایسی محبت بھی تھی جو کبھی اپنے انجام تک نہ پہنچ سکی۔

اداکار نے کہا کہ زندگی میں انسان کی ہر خواہش پوری نہیں ہوتی، کچھ محبتیں ادھوری رہ جاتی ہیں، ہماری محبت بھی ایسی ہی تھی جس کا اظہار کبھی نہ ہو سکا، ہم ایک دوسرے کے قریب رہتے تھے اور صرف نگاہوں کے ذریعے اپنے جذبات کا اظہار کرتے تھے، ایک دوسرے کا انتظار کرتے، ایک دوسرے کو دیکھتے اور خاموشی سے محبت کرتے تھے۔

مزید پڑھیں:گھر میں آتشزدگی، امریکی اداکار اہلیہ سمیت ہلاک

شہزاد مختار کے مطابق یہ محبت تقریباً 7 برس تک جاری رہی، لیکن دونوں میں سے کسی نے بھی اپنے جذبات کا اظہار نہیں کیا، یہ قصہ 1983ء کا ہے جب میں صرف 19 سال کا تھا۔

اداکار نے مزید کہا کہ میں اس سے پہلے شادی کے بندھن میں بندھ گیا تھا، جب میں دولہا بن کر گاڑی میں بیٹھا تو وہ مجھے دیکھ رہی تھی اور صرف چار دن بعد اس کی بھی شادی ہوگئی، میں رویا تھا، شاید وہ بھی روئی ہوگی۔

انہوں نے کہا کہ بعد ازاں میں نے اپنی تعلیم مکمل کی، ملازمت حاصل کی اور اپنے کیریئر پر توجہ دی، لیکن وہ محبت آج بھی میرے دل کے کسی کونے میں موجود ہے۔

شہزاد مختار کا کہنا ہے کہ میں آج بھی یہی کہوں گا کہ اس نے بھی اپنے جذبات کا اظہار نہیں کیا اور میں نے بھی نہیں کیا، شاید ہم دونوں اپنی انا کی وجہ سے خاموش رہے اور اب وقت گزرنے کے بعد ہم دونوں خالی ہاتھ رہ گئے ہیں۔