9 مئی کے واقعات میں ملوث نامعلوم افراد کون تھے؟

(عرفان ملک) چیئرمین پی ٹی آئی عمران خان کی گرفتاری کے بعد 9 مئی کو لاہور سمیت 5 شہروں میں جلاؤ گھیراؤ اور توڑ پھوڑ کے واقعات میں ملوث 3 ہزار 2 سو 80 نامعلوم افراد کی شناخت کرلی گئی۔

پولیس کے مطابق نامعلوم افراد کو بی کیٹگری میں رکھ کر شناخت کیا گیا، شناخت کیے گئے نامعلوم افراد دہشتگردی کے مقدمات میں نامزد ہیں۔

پولیس ذرائع کا کہنا ہے کہ بی کیٹگری کے 3 ہزار 2 سو 80 میں سے 1 ہزار 7 سو 67 ملزمان شناخت کے بعد گرفتار کرلیے گئے ہیں۔

یہ بھی پڑھیے: جلاؤ گھیراؤ، ہنگامہ آرائی کیس، خدیجہ شاہ کی رہائی کے لیے دائر درخواست پر سماعت آج ہو گی

اس حوالے سے ملنے والی مزید معلومات کے مطابق لاہور سے 5 سو 36، گوجرانولہ سے 4 سو 4، راولپنڈی سے 2 سو 34، سرگودھا سے 4 سو 93 جبکہ فیصل آباد سے 100 نامعلوم افراد شناخت کے بعد گرفتار کیے گئے۔

گرفتاری کے بعد ان تمام افراد کے شناختی کوائف کریمنل ریکارڈ میں شامل کرلیے گئے ہیں۔

پولیس کا کہنا ہے کہ باقی رہ جانے والے 1 ہزار 5 سو 13 افراد کی گرفتاری کی کوششیں تیز کردی گئی ہیں۔

خیال رہے کہ لاہور سمیت دیگر اضلاع میں درج 52 ایف آئی آرز میں 1 ہزار 5 سو 34 ملزمان نامزد ہیں۔