سکولوں میں موسمِ سرما کی تعطیلات دسمبر کے بجائے جنوری میں کرنے پر غور

(ویب ڈیسک ) سکولوں میں موسمِ سرما کی تعطیلات دسمبر کے بجائے جنوری میں کرنے پر غور شروع کردیا گیا  کیونکہ جنوری میں شدید سردی کے باعث درجہ حرارت گر جاتا ہے۔

تفصیلات کے مطابق سندھ ایجوکیشن اینڈ لٹریسی ڈیپارٹمنٹ  سکول طلبہ کے لیے موسمِ سرما کی تعطیلات دسمبر کے بجائے جنوری میں منتقل کرنے پر غور کر رہا ہے۔

یہ اقدام اس لیے زیرِ غور ہے کیونکہ گزشتہ چند سالوں کے مشاہدات کے مطابق سب سے شدید سردی جنوری میں آتی ہے، جب تیز ہوائیں اور کم درجہ حرارت طلبہ کو متاثر کر سکتے ہیں۔

محکمہ تعلیم کے حکام کا کہنا ہے کہ آب و ہوا میں تبدیلیوں کے پیشِ نظر یہ تجویز سامنے آئی ہے، اس معاملے پر محکمہ کی  سٹیئرنگ کمیٹی آئندہ اجلاس میں غور کرے گی۔

 اگر یہ تجویز منظور ہو گئی تو کراچی سمیت ملک کے جنوب مشرقی علاقوں کے سکولوں میں موسمِ سرما کی تعطیلات دسمبر کے آخری دنوں کے بجائے جنوری میں ہوں گی۔

حالیہ برسوں میں دسمبر کے مہینے میں موسم نسبتاً معتدل رہا ہے جبکہ جنوری میں شدید سردی کے باعث درجہ حرارت اکثر ایک ہندسوں تک گر جاتا ہے،موجودہ تعلیمی کیلنڈر کے مطابق سکول یکم جنوری کو دوبارہ کھل جاتے ہیں جس سے طلبہ کو سب سے زیادہ سرد موسم کا سامنا کرنا پڑتا ہے۔

اس سال بھی سکول موسمِ سرما کی سب سے سخت لہر کے آغاز سے پہلے کھل گئے تھےجس کے باعث تعلیمی حکام نے وقتی طور پر سکول کے اوقات میں تبدیلی کرتے ہوئے 12 سے 26 جنوری تک کلاسیں صبح 9 بجے سے شروع کرنے کی ہدایت کی۔

یہ اقدام طلبہ کی صحت اور تعلیمی سہولت کو مدنظر رکھتے ہوئے کیے جانے کا امکان ہے تاکہ سخت سردی میں بچوں کی نقل و حرکت اور تعلیم پر منفی اثر نہ پڑے۔

یہ بھی پڑھیں:  کراچی میں سردی بڑھنے سے سانس کے امراض میں اضافہ