ماہرین قلب کا روزانہ 15 سے 30 منٹ ننگے پاؤں چلنے کا مشورہ

(24 نیوز )روزانہ 15 سے 30 منٹ تک ننگے پاؤں چلنا صحت کے لیے مفید ثابت ہو سکتا ہے، ماہرین نے ننگے پاؤں چلنے کو صحت مند طرزِ زندگی کا حصہ بنانے کی تجویز دی ہے۔ 

ماہرینِ قلب کے مطابق گھاس، ریت یا مٹی پر ننگے پاؤں چلنے سے جسم کو قدرتی حرکت، بہتر توازن اور ذہنی سکون حاصل کرنے میں مدد ملتی ہے، صحت بہتر بنانے کے لیے پاؤں کو زمین سے رابطے میں لانا چاہیے۔

ماہرین کا کہنا ہے کہ ننگے پاؤں چلنے سے پاؤں کے قدرتی عضلات اور اعصاب متحرک ہوتے ہیں جبکہ جسم کی ساخت اور چال میں بھی بہتری آتی ہے۔

ننگے پاؤں چلنے سے پاؤں کے عضلات، رگوں اور جوڑنے والی بافتوں کو قدرتی انداز میں حرکت کرنے کا موقع ملتا ہے جس سے پاؤں کی طاقت اور لچک بہتر ہوتی ہے۔

جوتوں کے بغیر چلنے سے جسم کو قدرتی انداز میں حرکت کرنے میں مدد ملتی ہے جس سے جسمانی توازن اور استحکام بہتر ہوتا ہے اور خاص طور پر عمر رسیدہ افراد میں گرنے کے خطرے کو کم کرنے میں مدد ملتی ہے۔

پاؤں کے اعصابی سروں کو مختلف سطحوں کا براہِ راست احساس ہوتا ہے جس سے جسم کو اپنی پوزیشن اور حرکت کا بہتر اندازہ ہوتا ہے,اسے جسمانی ادراک کہا جاتا ہے جو ہم آہنگی اور جسمانی کارکردگی کے لیے اہم ہے۔

یہ بھی پڑھیں :قومی ہاکی ٹیم کا دورۂ جنوبی کوریا ، شیڈول جاری