سیلاب: ڈسٹرکٹ جیل سیالکوٹ کے ایک ہزار سے زائد قیدی پنجاب کی دیگر جیلوں میں منتقل

( ویب ڈیسک )ڈسٹرکٹ جیل سیالکوٹ کے ایک ہزار 7 قیدیوں کو سیلابی صورتحال کے باعث پنجاب کی مختلف جیلوں میں منتقل کر دیا گیا ہے۔

 رپورٹ کے مطابق چیف منسٹر ٹاسک فورس برائے جیل خانہ جات کے چیئرمین رانا منان خان نے بتایا کہ ڈسٹرکٹ جیل سیالکوٹ کے 565 قیدی گوجرانوالہ ضلع جیل، 274 نارووال ضلع جیل اور 168 حافظ آباد ضلع جیل منتقل کیے گئے ہیں۔

ان کا کہنا تھا کہ گوجرانوالہ، نارووال اور حافظ آباد جیلوں میں منتقل ہونے والے قیدیوں میں مرد اور خواتین دونوں شامل ہیں، قیدیوں کو موجودہ سیلابی صورتحال سے بچانے کے لیے منتقل کیا گیا ہے۔

  یہ بھی پڑھیں:پاکستان کا بڑا قدم ،امریکہ کیلئے اہم سروس معطل  کر دی

 دوسری جانب سیالکوٹ کی فیکٹریوں میں کام کرنے والے قریبی علاقوں کے مزدور اپنے گھروں میں محصور ہو کر کھانے پینے کی ضروریات کے لیے ترس رہے ہیں۔ 

سیالکوٹ میں شدید بارشوں اور اچانک آنے والے سیلاب نے سڑکوں کو بری طرح نقصان پہنچایا ہے، جب کہ صنعتوں کی بندش نے صورتحال کو مزید سنگین کر دیا ہے، پسرو، چونڈہ، باڈیانہ، چپراڑ، بجوات اور علاقے کے سیکڑوں دیہات کے ہزاروں مزدور روزگار کمانے سے محروم ہوگئے ہیں۔

پسرور-سیالکوٹ روڈ پر اسلام سینٹر کے قریب پل گرنے سے ٹریفک معطل ہوگئی، جب کہ بھاگوال روڈ، کشنوالی اسٹاپ، ہیڈ مرالہ روڈ، شیرپور، بجوات اور چپراڑ سیکٹر سمیت دیگر علاقوں کو ملانے والی سڑکیں بھی سیلاب میں بہہ گئی ہیں، عوامی اور نجی ٹرانسپورٹ معطل ہونے سے مزدور 6 دن سے گھروں میں محصور ہیں۔