کورونا ویکسین لینے پاک فضائیہ کا طیارہ چین چلا گیا

(24نیوز) کورونا ویکسین لانے کے لئے پاک فضائیہ کا خصوصی طیارہ چین روانہ ہوگیا ہے۔

تفصیلات کے مطابق پاک فضائیہ کا آئی ایل 78 خصوصی طیارہ کورونا ویکسین لانے کے لئے نور خان ایئر بیس سے چین کے دارالحکومت بیجنگ کے لئے روانہ ہوگیا۔ پہلی کھیپ میں کورونا ویکسین کی 5 لاکھ خوراکیں لائی جائیں گی۔ چینی وزیر اعظم عطیہ کی گئی کورونا ویکسین پاکستان کے حوالے کریں گے۔  جو ہسپتالوں میں خدمات انجام دینے والے ڈاکٹروں اور طبی و غیر طبی عملے کو لگائی جائیں گی۔چین سے کورونا ویکسین ڈرائے آئس سے بھرے خصوصی کولڈ باکسز میں پاکستان لائی جارہی ہے۔

 دوسری جانب اسلام آباد میں ویکسین کے ذخیرے کےلئے تمام ضروری اقدامات کرلئے گئے ہیں۔ صوبوں کو ویکسین کی منتقلی کے حوالے سے بھی تمام انتظامات مکمل ہیں، این سی او سی میں ویکسین نرو سینٹر جبکہ صوبائی اور ضلعی سطح پر ویکسین کوارڈینیشن اینڈ ایڈمنسٹریشن سنٹرز بھی قائم کئے گئے ہیں۔

  گزشتہ روز وفاقی وزیر منصوبہ بندی اور این سی او سی کے سربراہ اسد عمر نے ٹوئٹ میں کہا تھا کہ ویکسین کی فراہمی کے لئے گلوبل الائنس کویکس کی جانب سے کورونا ویکسین فروری سے ملنا شروع ہوگی۔ پاکستان کو 60 لاکھ ویکسین مارچ تک مل جائیں گی۔ تمام ایک کروڑ 70 لاکھ خوراکیں 2021 کی پہلی ششماہی میں موصول ہو جائیں گی۔