" تمیز سےبات کریں،ہمیں آپ کی ضرورت نہیں"شعیب اختر برس پڑے

 (24نیوز)سابق اسپیڈ اسٹار شعیب اختر نے پاکستانی ٹیم کو واپس بھیجنے کی وارننگ دینے پر نیوزی لینڈ کرکٹ بورڈ کو آڑے ہاتھوں لے لیا۔پنڈی ایکسپریس نےمناسب انتظامات نہ کرنے پر  پی سی بی کو بھی کھری کھری سنائیں۔

تفصیلات کے مطابق پنڈی ایکسپریس شعیب اختر نے اپنے یوٹیوب چینل پر ایک ویڈیو اپ لوڈ کی ہے جس میں انہوں نے نیوزی لینڈ کرکٹ بورڈ کو مخاطب کرتے ہوئے کہا ہے کہ  یہ کوئی کلب ٹیم نہیں ہے، یہ پاکستان کی قومی کرکٹ ٹیم ہے۔ ہمیں آپ کی ضرورت نہیں ہے۔ ہماری کرکٹ ختم نہیں ہوئی، آپ کو ہمارا احسان مند ہونا چاہیے کہ ایسے مشکل وقتوں میں ہم نے آپ کے ملک کا دورہ کرنے کا فیصلہ کیا ہے۔

شعیب اختر نے برہمی کا اظہار کرتے ہوئےمزیدکہا کہ آپ پاکستان کے بارے میں بات کر رہے ہیں، آپ کو تمیز کرنی چاہیے اور اس طرح کے بیان دینے سے گریز کرنے کے ساتھ آئندہ کے لیے محتاط رہنا چاہیے۔دوسری جانب شعیب اختر نے پاکستان کرکٹ بورڈ (پی سی بی) کو مخاطب کرتے ہوئے کہا کہ قومی ٹیم کو وطن واپس بھیجا گیا تو آپ کو سختی کا مظاہرہ کرتے ہوئے نیوزی لینڈ کے ساتھ تعلقات ختم کرنے چاہیں۔علاوہ ازیں شعیب اختر نے قومی ٹیم کو دورہ نیوزی لینڈ کے لیے کمرشل پرواز پر بھیجنے پر پی سی بی پر بھی تنقید کی اور کہا کہ کیا پی سی بی کا دماغ کام نہیں کرتا؟ وہ ٹیم کے لیے چارٹرڈ پرواز کا انتظام نہیں کر سکتے تھے؟

واضح رہے کہ گزشتہ دنوں نیوزی لینڈ میں موجود قومی ٹیم کے 6 کھلاڑیوں کا کورونا ٹیسٹ مثبت آیا تھا جس کے بعد نیوزی لینڈ کی وزارت صحت کی جانب سے پاکستانی اسکواڈ کو آخری وارننگ دی گئی تھی کہ کووڈ-19 کی ایس او پیز کی خلاف ورزی کے نتیجے میں پاکستان ٹیم کو وطن واپس بھیج دیا جائے گا۔

خیال رہے کہ اس سے قبل دورہ انگلینڈ میں قومی کرکٹ ٹیم کو چارٹرڈ فلائٹ کے ذریعے روانہ کیا گیا تھا جس سے کورونا وائرس کا خدشہ کافی حد تک کم ہوتا ہے۔