ملک بھر میں ’’یوم پاکستان‘‘ آج بھرپور جوش و جذبے سے منایا جارہا ہے

(24نیوز) ملک بھر میں آج 84 واں یوم پاکستان بھرپور جوش و جذبے سے منایا جا رہا ہے۔ 

23 مارچ کو پوری قوم یوم پاکستان کے طور پر روایتی جوش و جذبے کیساتھ مناتی ہے، یوم پاکستان کے موقع پر آج ملک میں عام تعطیل ہے۔

یوم پاکستان کے موقع پر وفاقی دارالحکومت میں 31، صوبائی دارالحکومتوں میں 21 توپوں کی سلامی سے دن کا آغاز کیا گیا، مساجد میں وطن عزیز کی سالمیت اور ترقی وخوشحالی کی دعائیں کی گئیں۔ توپوں کی سلامی دینے کی تقریب میں موجود پاک فوج کے جوانوں نے نعرہ تکبیر بلند کیا، فضا اللہ اکبر اور پاکستان زندہ باد کے نعروں سے گونج اٹھی، جوانوں اور افسران کی جانب سے ملک کی سلامتی کیلئے خصوصی طور پر دعائیں بھی کی گئیں۔

دوسری جانب یوم پاکستان پر اسلام آباد میں مسلح افواج کی روایتی پریڈ کی جا رہی ہے، مسلح افواج کے جوانوں نے مہارت کا شاندار مظاہرہ کیا، چین اور برادر ملک آذربائیجان کے خصوصی دستے بھی پریڈ میں شامل ہیں۔ صبح سویرے اسلام آباد شکرپڑیاں کے پریڈ گراؤنڈ میں پاکستان رینجرز کے دستوں نے رینجرز ایگزی بیشن ڈرل کا شاندار مظاہرہ کیا، ڈرل کے دوران رینجرز کے دستوں نے ذہنی وجسمانی صلاحیتوں کوشاندار انداز میں شرکا کے سامنے پیش کیا۔

مزید پڑھیں:  مزار اقبال پر گارڈز کی تبدیلی کی پروقار تقریب

آرمی سکول آف میوزک کے دستے نے بھی سولو ڈرم کا مظاہرہ کر کے دیکھنے والوں پر سحرطاری کر دیا۔ پریڈ کے مہمان خصوصی صدر مملکت آصف علی زرداری ہیں جبکہ سعودی عرب کے وزیر دفاع سمیت غیر ملکی مہمان بھی شریک ہیں، تقریب میں آرمی چیف جنرل عاصم منیر سمیت سروسز چیف، وفاقی وزراء، ارکان اسمبلی اور غیر ملکی سفرا بھی موجود ہیں۔

پریڈ میں پاک فضائیہ کے شاہین فلائی پاسٹ بھی پیش کریں گے، صدر مملکت پریڈ کا معائنہ کریں گے، پریڈ میں صوبوں کا خصوصی ثقافتی شو بھی ہوگا اور فلوٹ مظاہرہ کریں گے، پریڈ کے موقع پر دفاع کے شعبہ میں پاکستان کی ترقی اور جدید اسلحہ کی نمائش کی جائے گی، اس کے علاوہ سیاسی اور مذہبی جماعتوں کے زیر اہتمام سیمینار اور کانفرنسوں کا انعقاد ہو گا، ریلیاں بھی نکالی جائیں گی۔