وفاقی حکومت کو قواعد و ضوابط میں تبدیلی کا اختیار نہیں،شیری رحمان

(ویب ڈیسک) کابینہ نے الیکشن کمیشن کے ضابطہ اخلاق قوانین میں تبدیلی کی منظوری دے دی، وفاقی کابینہ سے الیکشن کمیشن کے ضابطہ اخلاق کے قانون میں تبدیلی کی منظوری  کے بعد  اب وزراء اور ارکان اسمبلی انتخابی مہم چلا سکیں گے۔

 تفصیلات کے مطابق الیکشن کمیشن کے ضابطہ اخلاق کے قانون میں تبدیلی کیخلاف ردعمل دیتے ہوئے   پیپلز پارٹی کی رہنما شیری رحمان کاکہنا ہے کہ وزیروں کو الیکشن مہم چلانے کی اجازت کیسے دی جا سکتی ہے ، انہوں نے کہا کہ وفاقی حکومت کو الیکشن کمیشن کے قواعد و ضوابط میں تبدیلی کا اختیار نہیں ۔ صدر پاکستان بھی الیکشن ایکٹ میں اپنی مرضی کی تبدیلی نہیں کر سکتے ،سائبر کرائم قوانین میں ترامیم مخالفین کو نشانہ بنانے کیلئے استعمال ہونگی۔

سیکرٹری اطلاعات پیپلز پارٹی شازیہ مری نے کہا ہے کہ الیکشن ایکٹ اور پیکا قانون میں ترامیم حکومتی سازش ہے، الیکشن ایکٹ میں ترامیم آئندہ انتخابات میں دھاندلی کا نیا منصوبہ ہے۔ شازیہ مری کا کہنا ہے کہ حکومت کو اپنی نااہلی اور ناکامی واضح نظر آرہی ہے، اب ذاتی مفادات کے لیے قانون ہی تبدیل کیا جا رہا ہے۔رہنما پیپلز پارٹی شازیہ مری نے کہا کہ حکومت کو غیرقانونی اقدامات سے انتخابات چوری کرنے نہیں دیں گے، عوام کو نہ گھبرانے کا مشورہ دینے والی حکومت اب خود کیوں گھبرا رہی ہے۔ انہوں نے مزید کہا کہ پیکا قانون کے تحت عام لوگوں کی آواز کو دبانا غیرجمہوری اور عام شہری کے حقوق کی خلاف ورزی ہے، حکومت عام شہری کی آواز دبانے کیلئے ایسے اقدامات کررہی ہے جو آمریت میں بھی نہیں ہوئے۔

 انکا یہ بھی کہنا تھا کہ وفاقی حکومت ڈکٹیشن کے تحت ایسی قانون سازی نہ کرے جس کا کل وہ خود شکار بنیں، حکومت الیکشن ایکٹ اور پیکا قانون میں ترامیم کا فیصلہ فوری طور پر واپس لے۔
 یہ بھی پڑھیں:    معروف اداکارہ کی لاش کار سےبرآمد