ایرانی مظاہرین نے امام خمینی کے آبائی گھر کو نذر آتش کردیا

(ویب ڈیسک) ایران میں مظاہرین نے روحانی پیشوا آیت اللہ خمینی کے آبائی گھر کو آگ لگادی۔ سوشل میڈیا پر مشتہر ویڈیوز میں دیکھا جاسکتا ہے کہ مظاہرین آیت اللہ خمینی کے گھر کو آگ لگا رہے ہیں۔

انقلاب ایران کے بانی کو خراج عقیدت پیش کرنے کے لیے ان کے آبائی گھر کو میوزیم بنا دیا گیا تھا۔ ان کی قیادت میں 1979 میں انقلاب آیا تھا۔
خُمین میں مظاہرین نے حکومت مخالف نعرے لگائے، مظاہرین حکومت کے خاتمے کا مطالبہ کر رہے تھے۔ حکومت کی جانب سے کریک ڈاؤن کے باوجود ایران میں مظاہرے جاری ہیں۔

ایران میں حکومت مخالف احتجاج تیسرے مہینے میں داخل ہوگیا ہے۔ رواں ہفتے ’خونی نومبر 2019‘ کی برسی منانے کے لیے سینکڑوں مظاہرین سڑکوں پر نکلے تھے۔ نومبر 2019 میں ایندھن کی قیمتوں میں اضافے کے خلاف احتجاج کے دوران سینکڑوں افراد ہلاک ہوئے تھے۔

Remarkable: Protestors in Iran torched the ancestral home (now a museum) of Ayatollah Khomeini, the father of the 1979 revolution, in the town of Khomein. pic.twitter.com/ikWMVVfzfM

— Karim Sadjadpour (@ksadjadpour) November 18, 2022

رواں برس ستمبر میں 22 سالہ ایرانی کرد خاتون مہسا امینی کی ہلاکت کے خلاف احتجاج شروع ہوا تھا جو دنیا بھر میں پھیل چکا ہے۔

انسانی حقوق کی تنظیموں کا کہنا ہے کہ مہسا امینی کی ہلاکت کے خلاف مظاہروں میں 300 سے زیادہ افراد مارے گئے ہیں اور ہزاروں کو حراست میں لیا جا چکا ہے۔

حکومت نے رواں ہفتے پانچ افراد کو سزائے موت سنائی ہے۔ حکومت نے کہا تھا کہ اشتعال پھیلانے والوں کے خلاف سخت اقدامات کیے جائیں گے۔