سستے تیل اور ایل این جی کی خریداری کا معاملہ، روس اور پاکستان کے درمیان پہلا اجلاس ختم

(24نیوز)پاکستان اور روس کے درمیان سستے تیل  اور  ایل این جی کی خریداری سمیت دیگر شعبوں میں تعاون کے لیے  وفد لیول کا  اجلاس مکمل ہو گیا ہے۔

دونوں ممالک کے مابین 30 فیصد رعایت پر تیل کی خریداری ،گندم کی خریداری اورتجارت ، معیشت ، سائنس و تکنیکی تعاون کے شعبوں میں تعاون کے فروغ کے لیے بات چیت ہوئی ،  اجلاس میں میں روس کے 80 رکنی وفد نے شرکت کی، پاک روس بین الحکومتی کمیشن کے اجلاس سے وفاقی سیکرٹری اقتصادی امور ڈویژن ڈاکٹر کاظم نیاز نے خطاب کرتے ہوئے کہا کہ پاکستان اور روس کے درمیان مختلف شعبوں میں تعاون کی مسابقتی استعداد سے بھرپور فائدہ اٹھانے کی ضرورت ہے۔

 کاظم نیاز نے مزید کہا کہ ملک میں گزشتہ مون سون کے دوران آنے والے سیلاب سے بڑے پیمانے پر جانی و مالی نقصان ہوا ہے اور  پاکستان سیلاب متاثرہ افراد کی امداد کے لیے بین الاقوامی برادری کی حمایت کو سراہتا ہے، عالمی برادری نے بحران کے وقت میں پاکستان کی جو مدد کی، وہ قابل تعریف ہے۔انہوں نے کہا کہ پاکستان اور روس کے بین الحکومتی کمیشن کے اس افتتاحی سیشن کا مقصد مختلف شعبوں میں تعاون کی راہیں تلاش کر کے دونوں ممالک کے درمیان تعلقات کو فروغ دینا ہے۔

ڈاکٹر کاظم نیاز کا کہنا تھا کہ پاکستان تجارت، معیشت اور سرمایہ کاری کے شعبوں میں روس سمیت عالمی برادری کے ساتھ تعلقات اور تعاون کو فروغ دینا چاہتا ہے اور یہ موجودہ حکومت کی اولین ترجیحات میں بھی شامل ہے، روسی وفد کے سربراہ اور وزارت اقتصادی ترقی کے ڈپٹی ڈائریکٹر اسرافیل علی زادے نے اجلاس سے خطاب میں کہا کہ روس پاکستان کے ساتھ اپنے تعلقات کو قدر کی نگاہ دیکھتا ہے،اس وقت معیشت کے مختلف شعبوں میں دونوں ممالک کے مابین اچھے تعلقات قائم ہیں اور ہم اس میں مزید فروغ چاہتے ہیں ، دونوں معیشتوں میں وسیع استعداد موجود ہے جس سے استفادہ کرنے کی ضرورت ہے۔ واضح رہے کہ دونوں ممالک کے درمیان وزرا لیول کا اجلاس کل ہو گا , جس میں معاہدوں کو حتمی شکل دی جائے گی ۔