سعودی عرب میں موسلا دھار بارشیں،تعلیمی ادارے بند، آن لائن کلاسز شروع

(24نیوز)سعودی عرب کے مختلف علاقوں میں موسلا دھار بارشوں کے باعث سکول اور کالجز بند کر دئیے گئے، آن لائن کلاسز شروع کردی گئیں۔

رپورٹ کے مطابق سعودی عرب کے مشرقی صوبے، الباحہ اور عسیر میں مسلسل موسلا دھار بارشوں کے باعث  کلاسز معطل رہیں۔

موسمی الرٹ کے پیش نظر سکولوں میں تدریسی عمل "مدرستی” پلیٹ فارم کے ذریعے آن لائن جاری رہا، دمام، خُبر، قطیف، جبیل، رأس تنورہ اور الاحساء کے تعلیمی اداروں میں آن سائٹ کلاسز بند رہیں۔

الباحہ اور عسیر کی متعدد جامعات نے بھی آن سائٹ کلاسز روک کر آن لائن تعلیم کا آغاز کردیا، تعلیمی اداروں سے متعلق اہم فیصلے نیشنل سینٹر فار میٹرولوجی کی رپورٹ پر کیے گئے۔

اس حوالے سے سعودی حکام کا کہنا ہے کہ تعلیمی ادارے بند کرنے کا فیصلہ طلبہ اور عملے کی حفاظت کے پیش نظر کیا گیا ہے۔

محکمہ موسمیات کے مطابق سعودی عرب کے مختلف علاقوں میں گزشتہ 24 گھنٹے کے دوران موسلا دھاربارش ریکارڈ کی گئی، سب سے زیادہ بارش عسیر اور ریاض کے علاقوں میں ریکارڈ کی گئی۔

یہ بھی پڑھیں:ایران امریکہ مذاکرات میں ڈیڈلاک، خام تیل کی قیمت میں ہوشرباء اضافہ

ابہا ایئرپورٹ پر65.6ملی میٹر، ریاض کے کنگ خالد ریزرو میں42.2ملی میٹربارش ریکارڈ، جبکہ دمام کے علاقے القادسیہ میں20.6اور جازان کے الدرب میں 11.2 ملی میٹر بارش ہوئی۔

محکمہ موسمیات کا کہنا ہے کہ اس کے علاوہ نجران، الباحہ، مکہ اور قصیم کے مختلف علاقوں میں بھی ہلکی اور تیز بارش ریکارڈ کی گئی۔

سول ڈیفنس کی جانب سے شہریوں کو احتیاط برتنے اور حکومتی وارننگز پر سختی سے عمل کرنے کی ہدایت جاری گئی ہے۔