سربراہ پاک فضائیہ ائیر چیف مارشل ظہیر احمد بابر سدھو سے انڈونیشیا کےدفاعی وفد کی ملاقات 

(احمد منصور) سربراہ پاک فضائیہ ائیر چیف مارشل ظہیر احمد بابر سدھو سے انڈونیشیا کے  دفاعی وفدنےوزیر دفاع لیفٹیننٹ جنرل ر سجعفری سجمس الدین کی سربراہی میں ملاقات کی،ملاقات میں پاکستان اور انڈونیشیا کے درمیان تاریخی اور برادرانہ تعلقات کی توثیق کی گئی۔

 پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق ائیر چیف اور انڈونیشین دفاعی وفد کی ملاقات ائیر ہیڈکوارٹرز اسلام آباد میں ہوئی،ملاقات میں پاک انڈونیشیا فضائی افواج کے تعاون کو مزید مضبوط بنانے پر توجہ مرکوز کی گئی جبکہ استعداد کار میں اضافے،تربیت اور تکنیکی تعاون کے حوالے سے دونوں جانب سے زور دیا گیا۔ 

بیان کے مطابق ایئر چیف نے انڈونیشئین وفد کو پاک فضائیہ کے جدت طرازی پروگرام سے آگاہ کیا،انڈونیشین وزیرِ دفاع نے پاک فضائیہ کی پیشہ ورانہ مہارت، جنگی تیاری اور نیشنل ایرو اسپیس سائنس اینڈ ٹیکنالوجی پارک کے تحت مقامی سطح پر  کامیابیوں کو سراہا۔ 

بیان میں مزید کہا گیا کہ انڈونیشین وفد نے تربیت، ہوا بازی اور ایرو اسپیس کے شعبوں میں تعاون کے فروغ میں گہری دلچسپی کا اظہار کیا۔

آئی ایس پی آر کے مطابق ملاقات پاک انڈونیشیا دفاعی تعلقات میں پیش رفت اور مسلسل رابطوں و مکالمے کے ذریعے تعاون کو مزید گہرا کرنے کے عزم کی عکاس ہے۔ 

یہ بھی پڑھیں :  افغان کرکٹر محمد نبی اور بیٹے نے ایک ہی ٹیم میں کھیل کر نئی تاریخ رقم کردی